په‌رله‌مان عراق ئاماده‌س دانيشتنيگ له‌وه‌ر ناوناين سه‌رۆك حكومه‌ت ساز بكا
2020-01-30T08:25:21+00:00
شه‌فه‌ق نيوز/ به‌شير حه‌داد جيگر سه‌رۆك ئه‌نجومه‌ن نوێنه‌ره‌يل عراقى، ئاشكراى ئاماده‌يى ئه‌نجومه‌نه‌گه كرد ئه‌را سازكردن دانيشتنيگ جيا له هه‌ر وه‌ختيگ وه‌خاتر ده‌نگداين له‌بان سه‌رۆك ئه‌نجومه‌ن وه‌زيره‌يل تازه له‌جياى عادل عه‌بدولمه‌هدى وه‌و مه‌رجه په‌سه‌نكردن مه‌ردمى وه‌ده‌س هاوردوێد.
حه‌داد له به‌ياننامه‌يگ وت: بايه‌سه له‌بان لايه‌نه‌يل سياسى هه‌ڵه‌په‌ڵه بكه‌ن له يه‌كلاكردنه‌وه‌ى كانديد ئه‌را سه‌رۆكايه‌تى وه‌زيره‌يل، چوينكه بارودوخه‌گه جى نيگه‌رانيه له‌ساى خوه‌ينيشانداينه‌يل وه‌رده‌وام و كه‌فتنه‌وه‌ى قوربانى وه رووژانه‌و وه‌رامبوين گرژى.
يه‌يش له‌وه‌ختيگه به‌رهه‌م ساڵح سه‌رۆك كۆمار تا رووژ شه‌ممه‌ى ئاينده مووڵه‌ت دا لايه‌نه‌يل سياسى ئه‌را هه‌ڵوژانن سه‌رۆك تازه‌ى حكومه‌ت ناوه‌ندى.
