وه کۆڕۆنا.. یەک مردن و ١٩٢ تووشهاتن نوو لە دوو پارێزگا
شەفەق نیوز/ دوو سەرچەوەی پزشکی، سێشەممە، خەوردان لە تۆمارکردن یەک مردن و ١٩٢ تووشهاتن نوو وە ڤایڕۆس کۆڕۆنا، لە پارێزگای دیالە و زیقار.
سەرچەوەیگ پزشکی لە دیالە ئەرا ئاژانس شەفەق نیوز وت: ٢٦٦ نموونە ئمڕو تاقیکریا لەلیان ٦٢ تووشهاتن دەرکەفت، ٢ لەلیان کادر پزشکیە، و ٧ کارد تەندروسیە، و تیش؛ هەژمار گشتی تووشهاتنەگان دیالە بویە ١٧٤٧ .
سەرچەوەگە ئاماژەدا وە تۆمارکردن مردنیگ نوو لە پارێزگاگە، تا بڕ مردگەیل پارێزگاگە بڕەسێدە ١٠٠ کەس لەوەخت دیارکەفتن پەتاگە وەرجە ١٢٤ رووژ لە دیالە.
وتیش ؛ پارێزگاگە خاسەوبوین ٧٥ بیمار لە ڤایڕۆسەگە تۆمار کرد، تا هەژمار گشتی خاسەوبویەیل بوودە ٩٠٩ کەس، وەرێژەی ٥٢ لە سەد لە بڕ تووشهاتگەیل.
لە لای خوەیەو، سەرچەوەیگ پزشکی لە زیقار خەوەردا ئاژانس شەفەق نیوز؛ ک پارێزگاگە ١٣٠ تووشهاتگ نوو وە ڤایڕۆس کۆرۆنا تۆمار کرد.
سەرچەوەگە وتیش: ٨٢ لە تووشهاتگە نووەگان لە ناسریە ناوەند پارێزگاگە تۆمار کریا.
وەگشتی، عراق ٦٢ هەزار و ٢٧٥ تووشهاتگ وە ڤایڕۆس کۆرۆنا تۆمار کردگە، لە وەخت دیارکەفتن پەتاگە لە وڵاتەگە لە ئادار گوزەیشتە، لەلیان دوو هەزار و ٥٦٧ مردن، و ٣٤ هەزار و ٧٤١ خاسەوبوین.
