وه‌زيريگ بريتانى عوزرخوازێ له‌باره‌ى رۆڵ خوه‌ى له جه‌نگ عراق ره‌ته‌و ئه‌كا
شه‌فه‌ق نيوز/ جاك سترۆ وه‌زير خارجيه‌ى وه‌رين بريتانى، عوزرخوازێ راسه‌وخۆ له‌باره‌ى رۆڵى له جه‌نگ عراق و ئاكامه‌يلى ره‌ته‌و كرد و جه‌خت له‌وه كرد رژيم سه‌دام مه‌ترسى بويه ئه‌را ئاسايش ناوچه‌گه‌و جه‌هان، وه‌لێ له هه‌مان وه‌خت داخ كيشا ئه‌را ئه‌و وه‌زعه ك هاته تويش عراق و له‌تى قوربانيه‌يل فريه‌يگ كه‌فته‌و.
سترۆ له باسيگ ئه‌را به‌رنامه‌يگ ته‌له‌فزيۆنى وت: ئه‌گه‌ر وشكاننكاره‌يل له هه‌ر قۆناغيگ ئاشكراى بكرديان ئه‌را ئه‌نجومه‌ن ئاسايش ك سه‌دام هاوكاره‌و رێ ئاسانه‌و ئه‌كا، ئه‌وه مه‌سه‌له‌گه وه‌و حاڵه نه‌ڕه‌سى و جه‌نگ دويره‌و خستيايم.
سترۆ هه‌ميش وت: وه‌لێ ئه‌وان نه‌وتنه سه‌دام چه‌ك جه‌مكوش نه‌يرێد، به‌ڵكوو وه‌چه‌واشه‌وه گشت به‌ڵگه‌يليگ ئاماژه وه ئه‌وه كردياد ك سه‌دام ئه‌و چه‌كه ديرێد تا دويا رووژيگ له دانيشتن كووتايى ئه‌نجومه ئاسايش ناوده‌وڵه‌تى له 7 ئادار 2003، ك هووكار ئه‌وه‌يش شايه‌ت له‌وه‌ر ئه‌وه بويه سه‌دام مه‌ترسى له‌وه داشتگه له‌وه‌رده‌م ملله‌ت عراق و له‌وه‌رده‌م ئيرانيه‌يل بويشێد ك ئه‌و چه‌كه نه‌يرێد، وه‌لێ دوباره دروو دا وه‌ل ملله‌ته‌گه‌و وه‌ل كۆمه‌ڵگاى ناوده‌وڵه‌تى و ئه‌وه بوى خوه‌ى چاره‌نويس خوه‌ى دياريكرد.
