وه‌به‌شدارى ئايين و تايفه‌يل.. هه‌ڵمه‌ت ره‌مه‌زانى دژ كۆرۆنا له كه‌ركوك
شه‌فه‌ق نيوز/ ئمڕوو نوێنه‌ر وه‌قفه‌يل سنى و شيعه و مه‌سيحى له كه‌ركوك، به‌شدارى له هه‌ڵمه‌تيگ كردن ئه‌را دسميه‌ت خيزانه‌يل فه‌قير و پاككردنه‌وه‌و ده‌رمانڕشانن له پاريزگاگه له‌وه‌ر روێ وه‌ڕوێ بوينه‌وه‌ى په‌تاى كۆرۆنا.
له‌ى باوه‌ته‌و، فراس حه‌مدانى ريكخه‌ر هه‌ڵمه‌ته‌گه له باسيگ ئه‌را شه‌فه‌ق نيوز وت: ده‌زگاگه ئى هه‌ڵمه‌ته ريكخستگه ك وه‌رپرسه‌يل له هه‌ردوگ وه‌قف سنى و شيعه و سه‌رۆك ئه‌ساقفه‌ى كلدان ئه‌گرێده خوه‌ى ئه‌را ده‌سميه‌تاين فه‌قيره‌يل له‌ڕێ دابه‌شكردن سه‌وه‌ته‌يل خوه‌راك و هه‌وه‌جه‌يل تر ره‌مه‌زانى.
لاى خوه‌ييشه‌و مه‌عروف بورهان وه‌ڕيه‌وبه‌ر به‌ش زه‌كات له وه‌قف سنى له باسيگ ئه‌را شفه‌ق نيوز وت: به‌رنامه‌ى هه‌ڵمه‌ت ئمساڵ دابه‌شكردن هه‌وه‌جه‌يل ده‌مه‌وكردن و زه‌كات و سه‌وه‌ته‌ى خوه‌راك گرته‌سه خوه‌ى ئه‌را دابشه‌كردنى له‌بان فه‌قيره‌يل وه‌ل پۆسته‌ره‌يل خوه‌يپاريزى له كۆرۆنا.
