کوشیان پولیسیگ وە چەقوو لە بەسرە و دەسگیرکردن باندیگ دزیی ویرەداریگ کردنە لە بەغداد
شەفەق نیوز/ سەرچەوەیگ ئەمنی، ئمڕوو جمعە، خەوەردا لە توومارکردن کوشتن ئەندامیگ پولیس لە پارێزگای بەسرە.
سەرچەوەگە ئەرا ئاژانس شەفەق نیوز وت: ئەو پولیسە وە چەقوو دریاس لە سینە و زگی، و وەمردگی پەیا کریا.
وتیش: تەرمەگە لە نزیک خاڵ پاسەوانی لەبان سکر بەسرە لە زوبێر پەیا کریا، وتیش؛ ناخڵەی شوینەگە دریا، و ریکارەیل یاسایی جیوەجی کریا.
هەرلیوا، وەزارەت ناوخۆی عراق، خەوەردا کە مەفرەزەیل دژە تاوان بەغداد، توەنستن باندیگ دەسگیر بکەن، دزییگ ویرەداریی لەناو ماڵیگ لە ناوچەی شارع فەلەستین لە بەغداد جیوەجی کردنە، کە زیاتر لە 125 ملیۆن و چشتەیلیگ گرانبەها بردنە.
وتیش: دویای وەرگردن ئاگاداری، مەفرەزەیل وەڕیەوبەرایەتیەگە تیم کارکردن دروس کردن، ئەرا وەشوینکەفتن تاوانکارەیل، و نووترین ئامرازەیل تەکنیکی وەکار هاوردن، و دویای تەقەلایل ئەمنی خەسیگ، تیمەگە توانست ناسنامەی دزەیل ئاشکرا بکەێد، و دەسگیریان بکەێد.
بەیاننامەگە دیاری کرد کە لەناو لێکۆڵینەوە، ئەندامەیل باندەگە ئاشکرای تاوان خوەیان کردن، و دادوەر بڕیار بەندیکردنیان وەگورەی مادەی 443 لە یاسای سزادان عراقی دا.
