کوشیان و زەخمداری و تەرمەیل ناو ئاو لە بەغداد
شەفەق نیوز/ سەرچەوەیگ ئەمنی، ئمڕوو شەممە، خەوەردا لە کوشیان چوار کەس و خوەیکوشتن کەسیگ و زەخمداری سێیان تر، و هەمیش تەرم دوو خنکیاگ دەرکریا، لە ناوچەیلیگ جیاجیا لە بەغداد پایتەخت.
سەرچەوەگە ئەرا ئاژانس شەفەق نیوز وت: مرافەیگ وە قسە کەفتە ناونی دوو هووز لە شار سەدر، رەسیە چەک و تەقەکردن، و یەک کەس لە مرافەگە و ژن ریواریگ لەلی بوینە قوربانی.
وتیش؛ هێزیگ ئەمنی رەسیە شوین رووداوەگە، باوجی تەقەکەرەیل وەرەو شوون نادیاریگ واین.
هەمیش وت: هاووڵاتییگ لەوەر هووکارەیل نادیاریگ لە ئاوای زەهەب ئەبیەز لە قەزای ئەبو غرێب خوەشک خوەی خوەی کوشت، و تاوانبارەگە دەسگیر کریا.
هەرلیوا، گەنجیگ لە داڵگبوی ٢٠٠٤ کەفتە وەر تلاتن ماتۆڕسکڵیگ لەناوچەی زەعفەرانیە.
لە رووداو جیایگ، خوەنەواریگ لە زانکۆ خوەی خستە چەم دیالە لە ناوچەی جسر دیالە و خوەی کوشت، و تەرمەگە دراوردن و بردنەی وەرەو پزشک دادوەری.
سەرچەوەگە نشان دا ک دوو برا تەقە لەبان دوو کابرای کاسپکار کردن، لەوەر مرافەیگ لەبان بڕێ پویل لە ناوچەی عوبەیدی.
و کابرای بیکاریگ وە گولەیگ دەنگی دەسکرتیگ لە ناوچەی حوریە زەخمدار بوی.
لەلاییگ تر، سەرچەوەگە ئەرا ئاژانس شەفەق نیوز وت: پۆلیس ئاوی تەرم خوەنەواریگ لەداڵگبوی ٢٠٠٣ لە چەمیگ لە ناوچەی فەحامە دراورد.
وەزارەت ناوخۆ لە بەیاننامەیگ رەسیە ئاژانس شەفەق نیوز وت: مەلەوانەیل پۆلیس ئاوی تەرم کوڕیگ ١٤ ساڵان لە چەم دیجلە دراوردن.
