کوشیان و زەخمداری دەیان کەس وە ئاگر ناو هۆڵ سویریگ خوەرهەڵات مووسڵ
2023-09-27T06:46:51+00:00
شەفەق نیوز/ سەرچەوەیگ ئەمنی، شەو سێشەممە، خەوەردا لە کوشیان و زەخمداری دەیان کەس وە هیزگردن ئاگریگ لەناو هۆڵ سویر لە قەزای حەمدانیە خوەرهەڵات شار مووسڵ.
سەرچەوەگە ئەرا ئاژانس شەفەق نیوز وت: ٢٠ کەس لەلای کەمەو گیانیان لەدەس دان و زیاتر لە ٥٠ کەسیش زەخمدار بوین، لە ئەنجام هیزگردن ئاگریگ لەناو ئەو هۆڵە کە وە پارچەی ساندویچ پەنەڵ دروس کریایە، و زیاتر لە ١٠٠٠ کەس مکیس کریایە لەناوی بوین.
سەرچەوەگە مەزەنە کرد لاشەی سزای لەناو هۆڵەگە مەنیە.
زانیاریەیل نیشان دان کە ئاگرەگە لە ئەنجام وەکارهاوردن ئاگربازی لەناو سویرەگە بڵویزە گردیە.
هەرلیوا، دکتۆر ساڵح مەهدی حەسناوی، وەزیر تەندروسی عراق فەرمانگەیل وەزارەتەگە لە پارێزگای نەینەوا و فەرمانگەیل هاوسای خستە ئامادەباشی، ئەرا وەهاناڕەسین زەخمدارەیل لەو رویداو ئاگرە لە قەزای حەمدانیە.
لەلای خوەییش، وەزارەت تەندروسی لە حکومەت هەرێم کوردستان دەسمیەتی پزشکی ئەرا پارێزگای نەینەوا کل کرد، دویای هیزگردن ئاگر ناو هۆڵ سویرەگە.
