کوشیان ئەندامیگ ئەمنی و دەسگیرکردن تیرۆرستیگ و بازرگانەیلیگ هووشبەری لە ٤ پارێزگای عراق

شەفەق نیوز/ سەرچەوەیگ ئەمنی، ئمڕوو جمعە، خەوەردا لە کوشیان ئەندامیگ ئەمنی وەشیوەی نادیاریگ لە پارێزگای زیقار، لە وەختیگ هیزەیل ئەمنی تیرۆرستیگ و بازرگانەیل هووشبەری لە بەغداد و بابل و نەجەف دەسگیر کردن.

سەرچەوەگە ئەرا ئاژانس شەفەق نیوز وت: هیزیگ ئەمنی تەرم ئەندامیگ هەواڵگری ناسریە پەیا کردن، کە لە ناوچەی حەولی وەشیوەی نادیاریگ کوشیاس.

سەرچەوەگە دیاری کرد کە هیزەگە تەرم قوربانیەگە ئەرا پزشک دادوەری برد، و لێکۆڵینەوە لە رویداوەگە واز کرد.

لەلای خوەییش، وەڕیەوبەرایەتی گشتی هەواڵگری و ئاسایش خەوەردا لە دەسگیرکردن ئەندامیگ تیرۆرست و پەنج بازرگان هووشبەری و دەسناین وەبان ٢٠ هەزار دەنگە حەپ هووشبەر لە بەغداد و بابل و نەجەف.

لە بەیاننامەیگ رەسیە ئاژانس شەفەق نیوز وت: مەفرەزەیلمان تیرۆرستیگ دەسگیر کردن یاداشت دەسگیرکردن وەگورەی مادەی (1/4) تیرۆر وەبانی دەرچگە، ئەوەیش لە یەکیگ لە ناوچەیل ناوڕاس پایتەخت.

لەلاییگ ترەک مەفرەزەیلی توەنستن بڕەسنە شوین بازرگانەیل هووشبەری لە بەغداد، و دووان لە بازرگانەیل و بفرووشەیل هووشبەری دەسگیر کردن و (20) هەزار دەنگە حەپ هووشبەر وەپییان بویە تواستنە لە ناوچەیل بەغداد بفرووشن، و ریکارەیل یاسایی وەگەردیان جیوەجی کریا.

هەمیش توەنستن سێ داواکریای ئەرا دادگا دەسگیر بکەن، لەناویان بازرگانەیل هووشبەری لە پارێزگای بابل و نەجەف.