کوشیان دوو کەس و زەخمداری کەسیگ لە دوو مەرافەی جیاجیا لە دوو پاریزگا
وەڕیەوبەر ناحیەی "کابیلۆن" سەر وە قەزاگە کامەران عەبدولا لە لێدوانیگ لەان تووڕ کۆمەڵایەتی "فەیسبوک" وت، کەسیگ دویەشەو تەقە لە کابرایگ 60 ساڵان کردیە و کوشتیەسەی و گلەوخواردیە تەقە لە کوڕ قوربانیەگە کردیە و زەخمداری کردیە ک تەمەنی لەبان 30 ساڵانە.
وتیش توومەتبارەگە وایە ئەرا شوین نادیاریگ و هیزەیل ئەمنی دەسکردنەس وە لێکۆڵینەوە لە رویداوەگە و زەخمدارەگەیش ئەرا خەسخانە کلکردنە.
هەمیش سەرچەوەیگ ئەمنی وە ئاژانس شەفەق نیوز وت: گەنجیگ گیان لە دەسدایە لە مەرافەیگ لەمابەین دوو خیزان لە ناحیەی سلێمان بەگ لە خوەرهەڵات سەڵاحەدین.
سەرچەوەی رویدان رویداوەگە مەرافەیگ کوینەس لە مابەین هەردگ خیزان دوارە نووەو بویە رەسیەس وە رویوەرویبوینەوە و وەکارهاوردن چەک بویەسە هووکار کوشیان گەنجیگ بیس ساڵان وە بەرکەفتن گولە لەقەێ سینگی.
وتیش تەرم قوربانیەگە ئەرا خەسخانەی دووزخورماتوو کلکریایە و هیزەیل ئەمنی لە شوین رویداوەگە ئامادەبوینە لێکۆڵینەوە لە رویداوەگە وازکردنە.
