کوشیان دویەتیگ یوتیوبەر عراقی وەدەس باوگی بیزار جادەی عراق کەێد
سەعەد مەعەن قسەکەر وەزارەت ناوخۆ لەبان تویتەر نویسان: دویەتیگ وەناو تیبە عەلی لە تەمەن ٢٢ ساڵان شەو ٣١ کانوون دویەم وەدەس باوگی لە پارێزگای دیوانیە کوشیا.
سایتەیل سۆشیال میدیا پارچە ڤیدیۆیگ لە قسەکردن قوربانیەگە وەگەرد باوگی بڵاو کردن، ک وەپی ئویشێد رازی نییە لە تورکیا بمینێد.
لیوا مەعەن وتیش: پولیس کۆمەڵایەتی چی ناو باوەتەگە تا بڕەسێدە چارەی گونجیاییگ رازی گشتی بکەێد.
وتیش: دویای یەکەمین گردەوبوین وەلایەن پولیس کۆمەڵایەتی وەگەردیان، ک تەگبیر بوی لەی رووژەگە جاریگتر چەویان لەیەک بکەفێد، خەوەر کوشیان دویەتەگە وەدەس باوگی رەسێد، و دویای ئەوە باوگەگە خوەی دادە دەس بنکەی پولیس.
سەرچەوەیگ ئەمنی لە پارێزگای دیوانیە، ئەرا ئاژانس فرانس پرس وت: ئی گرفتەیل خیزانیە لە ساڵ ٢٠١٥ دەسوەپی کردگە، و خیزانەگە لە ساڵ ٢٠١٧ چگەسە تورکیا، و دویای ئەوە دویەتەگە رازی نەویە وەگەردیان ئەرا عراق باێدەو، و دی لەورا مەنیە.
دویەتە قوربانیەگە، لەبان یوتیوب پارچە ڤیدیۆیل رووژانەی لە تورکیا بڵاو کردیاد.
ئەو تاوانە ک باوگەگە وەدەس خوەی جیوەجیی کرد، و دویەتەگەی خوەی تا مردن تاسانیە، تویڕەی فرەیگ لە عراق دروس کرد، ک هیشت بڕیگ لە چالاکوانەیل داوای خوەینشاندان لەوەردەم دادگای بەغداد بکەن.
خانمە چالاکوان و پارێزەرەیلیگ عراقی لەناو کۆمەڵگایگ پیاو سالاری رەنج گەورەیگ دەن تا وەرگری لە ماف ژن بکەن.
