کوشیان خانمیگ "سەماکار" وەدەس براگەی لە بەغداد

شەفەق نیوز/ سەرچەوەیگ ئەمنی وەرپرس، ئمڕوو یەکشەممە، خەوەردا لە کوشیان دویەتیگ لەناو یانەی شەوانە سەما کەێد، ئەوەیش وەدەس براگەی لە باشوور بەغدای پایتەخت.

سەرچەوەگە ئەرا ئاژانس شەفەق نیوز وت: دویەتیگ وەدەس براگەی وە چەقوو و گولە لەناو باڵەخانەیگ لە گەڕەک شورتە لەناوچەی دۆرە کوشیا.

دیاری کرد ک دویەتەگە کار سەماکاری لەناو یانەیگ شەوانە کەێد، و وەگەرد دویتەیل هاوڕیی لەو شوینە دانیشتنە.

سەرچەوەگە وتیش: وەگورەی قسەی دویەتەیل گوایە وەدەس براگەی کوشیاگە چوینکە لەماڵ باوانی وایە، و دیاری کرد ک توومەتبارەگە وەرەو شوینیگ نادیار وایە.

هەرلیوا، خود سەرچەوەگە وت: کابرایگ پەنا وە یەکیگ لە خاڵەیل وەشکین لە شار کازمیە بردیە، و وەپیان وتیە دویەتەگەی لەداڵگبوی ٢٠٠٢ بایی 4200000 دینار عراقی لەماڵ دزیە، و وەگەرد کەسیگ لەماڵ وایە.

وتیش: تیم کارکردن دروس کریا، و دویەتەگە و ئەو کەسەگە دەسگیر کریان، و پویلەگد ئەرا باوگەی گلەو دریا.