کوردەیل کەرکوک هەڕەشەی دادکرن فەرمانگەیلیگ دەن ک دویەم زوان فەرمی لە عراق پەراویز خستنە
شەفەق نیوز/ کوردەیل کەرکوک، ئمڕوو چوارشەممە، هەڕەشەی دادکردن ئەو فەرمانگە ولایەنیلە دان ک زوان کوردی لە کارەیل فەرمییان پەراویز کەن، و دووپات کردن ک وە گورەی دەستور ویاسا دویەم زوانە لە عراق.
جەماڵ محمد شەکور ئەندام ئەنجومەن وەرین کەرکوک و ئەندام یەکێتی نیشتمان کوردستان، ئەرا ئاژانس شەفەق نیوز وت: بەشیگ لە فەرمانگەیل زوان کوردی پەراویز کردن وهیمان لە یاداشتەیل فەرمییان پەراویزی کەن، هەرچەن بڕیاریگ دەستوری لە ئەنجومەن پارێزگاگە هەس ک پشت وە زوانەیل (عەرەبی و کوردی و تورکمانی و سریانی) بەسێد، باوجی بەشیگ لە فەرمانگەیل ئەو بڕیارە خەنە پشتگووش لەلیان دیوان پارێزگاگە وەرجە دوو ساڵ، و دویای ئەوە واز هاورد.
شەکور وتیش: بەشیگ لە فەرمانگەیل کەرکوک، زوان کوردی پەراویز خستنە و هیمان پەراویزی خەن، هەرچەن لە باڵاترین دەسەڵاتەیل تەشریعی و جیوەجیکردن وڵاتەگە وەکاری تیەرن، و دووپات کرد ک ئەوەسا کوردەیل سکاڵا لەبان هەر لایەنیگ توومار کەن ک دەستوور پیشێل بکەێد و تەقەلا بیەێد دویەم زوان فەرمی لە عراق گوما بکەێد.
بڕیاریگ وەرین لە ئەنجومەن پارێزگای کەرکوک ئویشێد: تابلۆیل فەرمانگەیل حکومەتی وە چوار زوان بنویسیەن، باوجی دویای رویداوەیل ١٦ی ئوکتۆبەر جیوەجی نەکریا.
هەمیش زوان کوردی و تورکمانی لە تابلۆی بینای نوو ئەنجومەن و پارێزگای کەرکوک لاوریا، ک لە باشوور شارەگە وە ٤٨ ملیار دینار دروس کریا، و تەنیا وەزوان عەرەبی مەنەی.
هەرلیوا، تابلۆی بینای نوو دادگای کەرکوک تەنیا وە زوان عەربی نویسیا، و هەمیش زوان کوردی لە تابلۆی فەرمانگەیلیگ حکومەتی تر لە پارێزگاگە لاوریا.
فڕۆکەخانەی کەرکوکیش، تابلۆگەی وە زوان عەرەبی و ئینگلیزی نویسیایە، و زوان کوردی لەناویان نییە، ودویای قسەکردن وەرد بەغداد لەی باوەتە، و لەبان ئەو ئاگاداریەیلە ک وەپی رەسین، پارێزگاگە رکدارە ک زوان کوردی وەکار نارێد.
