واران و داوەزیان پلەی گەرمی لە کەشوهەوای عراق تا رووژ دووشەممە
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای سوو جمعە لە فرلی ناوچەیل ناوڕاس و باشوور ئەورە وەگەرد واران سووکیگ، و لە ناوچەی باکوور ئەورە وەگەرد وارانیگ جاروبار رفتەو بوود، و پلەی گەرمی لە بەشەیل ناوڕاس و باکوور نزیک رووژ وەرجە خوەیە، و لە بەش باشوور کەمیگ نزمەو بوود.
وتیش؛ رووژ شەممە، لە ناوچەی ناوڕاس و باشوور رووشنە تا نیمچە ئەورە وەگەرد واران سووکیگ، و وەفروارین لە بەشە کویەیلە، و پلەی گەرمی لە گشت وڵاتەگە کەمیگ نزمەو بوود.
دەسەگە دیاری کرد کە رووژ یەکشەممە، لە ناوچەی ناوڕاس ئەورە وەگەرد نمە وارانیگ جیاجیا، و پلەی گەرمی نزیک رووژ وەرجە خوەیە، و لە ناوچەی باکوور ئەورە وەگەرد واران، و پلەی گەرمی نزیک رووژ وەرجە خوەیە، و لە ناوچەی باشوور رووشنە تا نیمچە ئەورە، و پلەی گەرمی کەمیگ نزمترەو بوود.
دەسەگە وتیش: کەشوهەوای وڵاتەگە ئەرا رووژ دووشەممەی ئایندە، لە گشت وڵاتەگە نیمچە ئەورە تا ئەور تەواوە وەگەرد نمە وارانیگ، و پلەی گەرمی لە بەشەیل ناوڕاس و باکوور نزیک رووژ وەرجە خوەیە، و لە بەش باشوور کەمیگ بەرزەو بوود.
