واران ئەرا عراق گلەو خوەێد
2024-04-28T13:30:41+00:00
شەفەق نیوز/ شارەزای کەشناسی عەلی جابر زیادی، ئمڕوو یەکشەممە، راگەیان کە شەپوولیگ واران و وای تون دووارە ئەرا کەشوهەوای عراق گلەو خوەێد، هەرلە سووەو تا سەرتای هەفتەی ئایندە وەردەوام بوود، و هوشداری لە نقومبوین ناوچە نزمەیل کرد.
زیادی ئەرا ئاژانس شەفەق نیوز وت: هەرە سوو شەوەکی زویەو ئەور وەرەو وڵاتەگە تیەێد، و لە بەشەیل باشوور لە موسەنا و نەجەف و باشوور ناسریە و بیاوان پەڵە دەێد، و ئەرا ئیوارە لە ناوچەیل فورات ناوڕاس وڵاوە بوود.
وتیش تا رووژ سێشەممە ناوچەیل فراوانیگ لە وڵاتەگە گرێدەو، و لویتکەی وارانەگە کەفێدە رووژەیل چوارشەممە و پەنجشەممە، و رفتی وارانەگە لە شوین تا شوینە، وەلێ وەگشتی واران رفتیگە و بەڵاچە وەگەردی هەس.
وتیش؛ تا رووژ شەممەی ئایندە واران وەردەوامە، و وەگەردی وای تونیگ تیەێد، ئەراوە مەزەنەی داوەزیان پلەی گەرمی نزیکەی دە تا هەشت پلە کریەێد وە تایبەت لە رووژەیل چوارشەممە و پەنجشەممە.
زیادی لە کۆتایی هوشداری لە رفتی وارانەگە و نقومبوین شوینە نزمەیل کرد.
