وینەیل رخبەریگ لە دهۆک تا باشوور عراق.. چەمەیل بوونە هەڵم

شەفەق نیوز/ لە وەختیگ هوشداریەیل جەهانی لە ئاڵشتبوین کەشوهەوا  وەردەوامە و ئەو هشکەساڵیە ک وەینزیکە ئەوەسا دەێد لە بڕیگ دەوڵەت لە جەهان، لە وەختیگ مەردم لەلای خوەیانەو لە کارەساتەکە دویرن، عراقیەیل ئی کارەسات نزیکە کەفتە وەرچەویان، ک هشکەساڵی دەسوەپی کرد و ئاوەگە دەسکردە هشکەوبوین،  و بی ئاوی هەڕەشەی زەوییان دا.

وینەیل رخبەریگ لەلایەن ئاژانس فرانس پڕس پڵاو کریا، لە ناوچەیلیگ جیاجیا، چ لە دهۆک لە هەرێم کوردستان، یا پارێزگای زیقار لە باشوور، هشکەساڵی سەختیگ و خاکیگ تیەنگ، و جیماگەیل چەمەیل نشان دان.

بڕیگیش لە عراقیەیل لەبان سۆشیال میدیا ئەو وینەیل خەفەتیە بڵاو کردن، ک زەنگ مەترسی کوتێد.

ئەو وینەیلە لە ئاسمانەو توومار کریانە، جیماگەیل ئاوای غاری کەسروکە نشان دەن، ک لەژیر ئاو نقوم بوێد، و لە ساڵ ١٩٨٥ چووڵ کریا، و لەی دویاییە بەشیگی کەفتە دەیشت، دویای داوەزین گەورەیگ لە ئاست ئاوەگە لە بەنداو دهۆک.

هشکەساڵیەگە لە زیاتر لە ٧٠ ئاوای لە باشوور عراق زاڵەو بویە لەناو تاوسان سویەریگ وەبی ئاو.

ئەو داوەزین گەورە لە ئاو چەم فورات بویە هووکار هشکەوبوین بەشیگ لە پەلەیل چەمەگە، و بیبەشکردن یەک لە سێیەی پارێزگای دیوانیە وەرەو باشوور، ک بەشیان ئەرا وەکارهاوردن رووژانە کەێد، لە وەختیگ بیس ویستگەی پاڵاوکردن ئاو لەکار وسیان.

بڕیگیش لە خەڵک ئەو ئاوایەیلە چەوەڕی رەدبوین تانکەرەیل ئاو کەن، ئەرا یەک تا دوو جار لە هەفتەیگ، تا کەمیگ لەو ئاوە بەشیان بیەێد.

زیاتر لە پەنج دەوڵەت جەهانی کەفتنەسە ژیر هشکەساڵی

جی باسە ک عراق لەوەر بەرزەوبوین وەردەوام لە پلەیل گەرمی و کەمەوبوین ئاوەگە ساڵ وەساڵ، کەفتیەسە ناو زیاترین پەنج دەوڵەت لە جەهان ک کەفتنەسە کاریگەری ئاڵشتبوین کەشوهەوا، وەگورەی نەتەوە یەکگرتگەیل.

عراق لەی دویاییە کەفتە وەر داوەزین گەورەیگ لە ئاست ئاو چەمەیل دیجلە و فورات، ئەوەسە ک دەسەڵاتەیل عراق ئویشن یە لەوەر بیناکردن بەنداوەیلە لەلایەن ئیران و تورکیا بویە.

هەرلیوا،  کووچبردن کەشوهەوایی، بویە کار زووریگ لەناو وڵاتەگە، وەگورەی ریخریاگ کووچبردن ناودەوڵەتی لە مانگ ئاب.

لە ئادار ساڵ ٢٠٢٢، زیاتر لە ٣٣٠٠ خیزان لەوەر کارەیل کەشوهەوا لە دە پارێزگا لە ناوڕاس و باشوور کووچ بردن، هەمیش لەوەر کەم ئاوی، یا نمەک زیایی، یا بەدی ئاوەگە.

کەم ئاوی هەمیش ریگری لە بەرهەم کشتوکاڵی کرد، خراویان کرد، و ئاو نووشین و لەوەڕ ئاژەڵ کەمەو کرد، هەمیش ناچار فرە کارەیلیگ وە بەسیان کرد ک پەیوەندی وە کشتوکاڵی دیرن.