ئەو کەسە ک دەنگ مالیکی بڵاو کرد دەنگ وەرپرسەیلیگ تریش دیرێد
شەفەق نیوز/ توومار دەنگ نووری مالیکی، سه‌رۆك وه‌زیرەیل وەرین عراق و سه‌ركرده‌ی هاوپه‌یمان ده‌وڵه‌ت یاسا، كاردانه‌وه‌ی فرەیگ کەفتە شوینی، هەنای قسە وە رەفتار سەدر و لایەنگرەیلی کەێد، دویاتریان په‌یامه ئاگرینه‌گە‌ی موقته‌دا سه‌در بوی، كه داوای دویرکەفتن و کنارگردن مالكی له پرۆسه‌ی سیاسی و ده‌سه‌ڵات له عراق کرد.
ئەو کەسە ک توومارە دەنگییەیل نوری مالكی بڵاو کردیە، رووژنامەنویسیگ عراقیە وەناو (عەلی فازڵ) و ته‌مه‌نی (36) ساڵە و ئیرنگە لە ئەمریکا داکاسیاس. ئەو کەسە له قسەیکی ئەرا رووژنامەی(العربی الجدید) هویردەکاری و زانیاری نوو باس کەێد، و ئویشێد: "توومار ده‌نگی فرەیگ لەلای هەس، و ته‌نیا تایبه‌ت نیین وە نوری مالكی.
عه‌لی فازڵ، لەباوەت بڵاوكردن پارچە دەنگیەیل مالیكی ئویشێد: "ئه‌وه ته‌نیا سه‌ره‌تایگه ئەرا ئاشكراكردن رسوایی ئه‌و وەرپرسەیل عراقە ک وڵاتەگە ویران کردنە".
هەرلیوا، عه‌لی فازڵ باس له‌وه کرد ک وتنە گوایه پارچە ده‌نگییه‌گه ساخته و دروسکریایه، ئویشێد: " توومارە ده‌نگییه‌یل ساخته نیین و دروسن و بی ده‌ستكاریكردنن و له یه‌ك دانیشتن ئه‌و قسەیلە کریانە، ته‌نیا پارچه پارچه‌یان کەم و بڵاویان کەم، چوینکە خەڵک عراق وەزوی چشت لەهویریان چوود، و منیش خوازم باوەتەگە وه‌رده‌وام بوود و لەهویر نەچوود".
هەمیش ئویشێد: باسەیل دانیشتن و گردەوبوین ژیروەژیر وەرپرسەیل عراق، ئەرا خزمه‌ت خه‌ڵك نییه، باوجی ئەرا خوەیپەرستی وەرپرسەیل و بەرژەوەنی حزبە. لەباوەت هووکار بڵاوكردن ئه‌و پارچە ده‌نگیەیلە له‌ی مەوقە، عه‌لی فازڵ، وت: "ئامانج من رمانن و له‌ناوبردن ئی سیستم حكومڕانی عراقە ک ئیسە حزب و گروپه چه‌كداره‌یل وەڕیەو بەن".
عه‌لی فازڵ ئاشكرا کەێد، تۆماره ده‌نگییه‌یل ته‌نیا تایبه‌ت نیین وە نوری مالیكی، باوجی به‌ڵگه و توومار ده‌نگی فرەترین وه‌رپرس و سه‌ركرده‌یل ئەو حزبه‌یل ها دەسی.
هەنای پرسیاری لەلی کیا ک ئایا كه‌ی ئه‌و به‌ڵگه و پارچە ده‌نگییەیل تر بڵاو کەێد؟. عه‌لی فازڵ وت: " ئەمار گه‌وره‌ی تۆماره ده‌نگییه‌یل و چشتیگتر سه‌ركرده و وەرپرسەیل عراق هالام، ک به‌ڵگه‌ن لەبان کوشتن عراقیەیل وگه‌نده‌ڵی، ئه‌وه کەمە سوپرایزێگ گه‌وره ئەرایان".
لەبارەی ئه‌و توومەتەیلە دریەێدە رویی، ک گوایه ئه‌و لایەنگر موقته‌دا سه‌دره، عه‌لی فازڵ وت: " هیچ جیاوازییگ ناوبەین نوری مالكی و موقته‌دا سه‌در نیەدوینم، ئه‌ویش به‌شداره له پرۆسه‌ی سیاسی عراق".
