وەزیریگ کوردستانی: ناکۆکیەیلیگ گەورا لەبان بوودجەگە وەگەرد بەغداد نییە
شەفەق نیوز/ دارا رەشید وەزیر پلانسازی لە هەرێم کوردستان، ئمڕوو سێشەممە، باس لە گەشبینی خوەی کرد لە بڕیاردان بوودجەی گشتی فیدڕاڵی ئەرا ساڵ ٢٠٢١ ، لەناوی بەشەگەی هەرێم، لەناو دانیشتنەیل هاتگ پەرلەمان عراق، دویای واژووکردن پڕۆژەی یاسای دادگای فیدڕاڵی باڵا.
رەشید لە کۆنگرەیگ رۆژنامەوانی لە ناو پەرلەمان کوردستان و ئاژانس شەفەق نیوز ئامادەی بوی وت: پڕۆژەی دادگای فیدڕاڵی بویە هووکار دیرکەفتن دانان پڕۆژەی یاسای بوودجەگە لەناو بەڕنامەی کارەیل ئەنجومەن نۆێنەران عراق، وتیش؛ یاسای دادگای فیدڕاڵی قۆناغەیل خاسیگ بڕێد، و ئیجا وەڕاستەخۆ دەسکیریەێدە دەنگدان لەبان بوودجەگە.
و ئاماژە کرد ک هیچ خاڵەیلیگ ناکۆکی لەناوبەین هەولێر و بەغداد لەبان پڕۆژەی بوودجەگە نییە، و ئیمە لە حکومەت هەرێم کوردستان پابەندیمن وە دەقەگەی ناو پڕۆژەی یاساگە ک لەلایەن حکومەت فیدڕاڵی رەوانە کریاگە.
وەزیرەگە هەمیش وت؛ هەڵبەتە هەر پڕۆژەی یاسایگ هەنای رەسێدە پەرلەمان ئاڵشتبوینەیلیگ کەفنە بانی، وەلی هیچ ناکۆکیەیل گەورایگ لەناوبەین ئیمە و لایەن و فراکسیۆنە سیاسیە عراقیەکان لەبان بوودجەگە نییە، و ئومید خوازیمن ئی باوەتە لەدانیشتنەیل هاتگ رەد بکریەێد، چوونکە بڕیاردان بوودجەگە هالە بەرژەوەنی عراق وە گشتی و هەرێم کوردستان وەتایبەت.
دەربارەی بوودجەی هەرێم ئەرا ئی ساڵە، وەزیر پلانسازی وت: رەشنووس پڕۆژەی بوودەجەی کوردستان ئامادەس، بەڵکم یەکیگ لە تەوەرەیلی باوەت بوودجەی وەکارخستن و بەرهەمهاوردن و بڕ ئەو پویلەیلە ک ئەوەسا کەفێدە دەس هەرێم هاناوی، و جەخت کرد ک باوەت دیاریکردن نرخ فرووشتن نەفت هەرێم پەیوەندەی وە بڕیار پەرلەمان لە بوودجە فیدڕاڵیەگە دیرێد.
