وەگەرد دەرچینی لە تەمووز.. سوو گەرمی ١١ پارێزگای عراق لە ٤٥ پلە رەد کەێد
2023-07-30T08:48:33+00:00
شەفەق نیوز/ دەسەی کەشناسی عراق، ئمڕوو یەکشەممە، مەزەنەی کەشوهەوای وڵاتەگە لەی رووژەیل بانانە بڵاو کرد، و باس بەرزەوبوین پلەی گەرمی لەی هەفتە کرد.
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای وڵاتەگە ئەرا سوو دووشەممە، خوەر گەرمە و پلەی گەرمی لە گشت وڵاتەگە نزیک رووژ وەرجە خوەیە.
وتیش؛ رووژ سێشەممە، خوەر و گەرمە، و پلەی گەرمی لە گشت وڵاتەگە کەمیگ بەرزترەو بوود.
وتیش؛ رووژ چوارشەممە، لە بەشەیل ناوڕاس و باکوور وڵاتەگە پلەی گەرمی کەمیگ بەرزەو بوود، و لە بەش باشوور نزیک رووژ وەرجە خوەیە.
دەسەگە وتیش؛ کەشوهەوای وڵاتەگە ئەرا رووژ پەنجشەممەی ئایندە، لە بەشەیل ناوڕاس و باکوور وڵاتەگە کەمیگ نزمەو بوود، و لە بەش باشوور نزیک رووژ وەرجە خوەیە.
