وەرپرسیگ هاناویان.. زەخمداری ٤ کەس وە دوو رویداو جیاجیا لە بەسرە و کەرکوک
2024-06-07T14:15:53+00:00
شەفەق نیوز/ سەرچەوەیگ لە پارێزگای بەسرە، ئمڕوو جمعە، خەوەردا لە زەخمداری قایمقام قەزای قورنە وەگەرد ژنەگەی وە رویداویگ هاتوچو دڵتەزن دویای چەن رووژیگ لە وەرگردن پۆستەگەی، و ژن و شوییگیش لەناو رویداویگ هاتوچو لە کەرکوک زەخمدار بوین.
سەرچەوەگە ئەرا ئاژانس شەفەق نیوز وت: رویداویگ هاتوچو لەبان ری گشتی قەزای قورنە باشوور بەسرە ناوەین دوو ماشین رویدا، یەکیگیان هن عەبدولمەجید حەسەن قایمقام قورنە بوی.
سەرچەوەگە دیاری کرد کە رویداوەگە بویە هوکار زەخمداری قایمقام و ژنەگەی، و ئەرا نزیکترین بنکەی تەندروسی بریان.
جی باسە کە عەبدولمەجید حەسەن هەفتەی گوزەشتە بویە قایمقام قەزای قورنە.
لە کەرکوک، سەرچەوەیگ لە فەرمانگەی هاتوچو کەرکوک خەوەردا کە رویداویگ هاتوچو کەفتە ناوەین دوو ماشین، یەکیگیان وەوی و زاوایگ لەناوی بوینە لە کاکەی بەغداد ناوڕاس شار کەرکوک، کە بویە هوکار زەخمداری هەردوگیان، و ئەرا خەسەخانە بریان.
