وڵات میسر پڕۆژەیلیگ نیشتەجیبوین لە عراق جیوەجی کەێد

شەفەق نیوز/ وەزارەت پلانسازی عراق، ئمڕوو پەنجشەممە، وت: ئەوەسا کۆمپانیایل میسری پڕۆژەیلیگ ئەرا گواستنەوە و نیشتەجیبوین لە وڵاتەگە جیوەجی کەن.  

ئەوەیش لە دیدار وەزیر پلانسازی عراق وەگورد باڵیۆز کۆمار میسر لەلای عراق هات. 

وەزارەتەگە لە بەیاننامیگ وت: لە دیدارەگە باس رویەیل هاوکاری هاوبەش ناوبەین دوو وڵاتەگە لە چینەیل جیاجیا کریا، و ئابووری و بەرهەمهاوردن وبازرگانی لەنوایان بوی. 

هەردوگ لایەنەگە هەمیش باس ئەنجامەیل بڕیارەیل لویتکەی سێیانی لە ئەنجومەن هەماهەنگی عراقی-میسری- ئوردنی کردن، و چەودیریکردن جیوەجیکردن پڕۆژەیل هاوبەش، تایبەت پڕۆژەیل گواستنەوە و نیشتەجیبوین ک ئەوەسا کۆمپانیایلیگ میسری لە عراق جیوەجیی کەن.