هيزيگ ئه‌مريكى له عراق چه‌وديرێ له‌بانى نيه‌و ئامانجيشى ئاشكراس
شه‌فه‌ق نيوز/ وه چه‌واشه‌ى باقى باڵيۆزخانه‌و نوێنه‌رايه‌تيه‌يل بيگانه له عراق، تاقم باڵيۆزخانه‌ى ئه‌مريكى له به‌غدا خاون هيزيگه ك گه‌وراترينه له‌ناونى هاوتايه‌يلێ و ناسرياگه وه‌ناو "يه‌كه‌ى ئه‌رك ئه‌مريكى" ك يه‌يش ناويگ ناسرياگه له‌لاى عراقيه‌يل و وه‌رپرسه‌يل ئه‌مريكييش تاووتوێ و باس له‌و هيزه‌يل راسپارياگه ئه‌را مقه‌يه‌تيكردن ئه‌مريكه‌يل ناكه‌ن ك له عراق كار ئه‌كه‌ن و شماره‌يان زياێ بويه له‌وه‌ختيگه‌و گرژى له‌ناونى ئه‌مريكاو ئيران زياێ كردگه له ناوچه‌گه.
له‌ى باوه‌ته‌و، ئه‌لعه‌ره‌بى ئه‌لجديد له زووان وه‌رپرسيگ عراقى وت: ئه‌و هيزه هيزيگ سڵا وه‌پيدرياگ ئه‌را وه‌كارهاوردن چه‌ك راسه‌وخۆ و جواودانه‌وه‌ى هه‌ر هه‌ڕه‌شه‌يگ ك مه‌ترسى بياشتود له‌بان نێرده‌يل دبلۆماسى سه‌ربازێ و نوێنه‌رايه‌تى ئه‌مريكا له عراق و كار له به‌رنامه‌ى جيگيركردن سه‌قامگيرى ئه‌كه‌ن له شاره‌يل ئازادكرياێ عراق يا به‌شدارى ئه‌كه‌ن له بريگ كرده‌وه‌يل ئاماده‌كارى ژيرخان ئابوورى جوور كه‌رته‌يل ته‌ندروستى و په‌روه‌رده.
وه‌گووه‌رى وه‌رپرسه‌گه، ئه‌و هيزه سڵا وه‌پى درياگه له‌لايه‌ن حكومه‌ته‌و جوور يه‌كه‌يگ ئه‌منى سه‌ر وه كۆمپانيايه‌يل ئه‌من بيگانه ئه‌را مقه‌يه‌تيكردن له نوێنه‌رايه‌تيه‌يل تر خوه‌رئاوا ك وجوود ديرن له عراق، وه‌لێ وه‌نسبه‌ت هيزه ئه‌مريكيه‌گه‌و هيزيگه گه‌وراتر و له‌ناونى ماوه‌يگ و ماوه‌يگ تر وه ئاگادارى حكومه‌ت عراقى جموجويل ئه‌كا له‌ناو شاره‌يل عراقى وه كه‌ره‌سه‌و سه‌ياره‌يليگ فريه‌ى سه‌ربازێ و راسه‌وخۆ په‌يوه‌ندى وه هيزه‌يل ئه‌مريكيه‌و ديرن له عراق و جارجاريگيش هيزه‌يل عراقى ياوه‌رييان ئه‌كه‌ن.
