هيزه‌يل عراقى په‌لاماريگ ئه‌را بان بنگه‌يليگ داعش له كويه‌يل مكحول ئه‌نجام دان
2020-03-09T08:44:26+00:00
شه‌فه‌ق نيوز/ شانه‌ى ره‌سانن ئه‌منى، ئاشكراى ئه‌وه كرد هيزه‌يل فه‌رمانده‌يى تايبه‌ت داوه‌زينيگ ئاسمانى جيوه‌جى كردنه ئه‌را بان بنگه‌يليگ گرنگ ريكخرياگ تيرۆيستى داعش له پاريزگاى سه‌ڵاحه‌دين.
شانه‌گه له به‌ياننامه‌يگ وت: وه‌گووره‌ى زانياريه‌يل هه‌واڵگيرى، پاڵه‌وانه‌يل فه‌رمانده‌يى تايبه‌ت له ده‌زگاى دژه تيرۆر پرووسه‌يگ داوه‌زين ئه‌نجام دانه ئه‌را بان بنگه‌يليگ گرنگ له پاشماوه‌يل داعش له كويه‌يل مه‌كحول له‌چوارچيوه‌ى كه‌رت فه‌رمانده‌يى سه‌ڵاحه‌دين و تائيسه‌يش وه‌رده‌وامه.
به‌ياننامه‌گه يه‌يش ده‌رخست ك هيزه‌يل فه‌رمانده‌يى تايبه‌ت دوياى دوينستنه‌وه‌ى تونێليگ له كويه‌يل مه‌كحول ك شوون چه‌كداره‌يل تيرۆريست بويه، سى تيرۆريست له‌ليان كوشتگه‌و هيمان جه‌نگيش وه‌رده‌وامه.
