هيزه‌يل عراقى پرووسه‌يگ سه‌ربازى له باشوور موسڵ ئه‌نجام دان
2020-05-03T11:41:31+00:00
شه‌فه‌ق نيوز/ هيزه‌يل عراق پرووسه‌يگ سه‌ربازى له باشوور موسڵ له پاريزگاى نه‌ينه‌وا ئه‌نجام دان، ئه‌ويش دوياى په‌لاماره‌يل دوباره‌كرياێ ريكخرياگ تيرۆريستى داعش له سه‌ڵاحه‌دين و دياله.
له‌ى باوه‌ته‌و، سه‌رچه‌وه‌يگ ئه‌را شه‌فه‌ق نيوز وت: هيزه‌يل عراقى هاوبه‌ش وه پشتگيرى هيزه‌يل ئاسمانى عراقى پرووسه‌يگ سه‌ربازى له حه‌وائج ناوچه‌ى كه‌نعووس و ناوچه‌يل تر له باشوور موسڵ ئه‌نجام دانه ئه‌را بنبڕكردن پاشماوه‌ى داعش.
جى باسه، يه‌يش له‌وه‌ختيگه ك سه‌رچه‌وه‌يل ئه‌منى و ناوچه‌يى باس له‌وه كردن كه‌رته‌يليگ له حه‌شد شه‌عبى تويش په‌لاماره‌يليگ جياجياى ريكخرياگ داعش هاتنه له ناوچه‌يل باشوور شار تكريت پايته‌خت ناوچه‌يى پاريزگاى سه‌ڵاحه‌دين و شماره‌يگ قوربانى و زه‌خمدار له‌ليان كه‌فته‌سه‌و.
