هاوپه‌يمانى نيشتمانى وشدارى دا خوه‌ينيشانده‌ره‌يل
له به‌ياننامه‌ى نويسينگه‌ى جه‌عفه‌رى ك دانيشتنه‌گه له‌تى ساز كرياو(شه‌فه‌ق نيوز)ئاگادارى بوى، ئه‌وه ده‌ركه‌فت ك هاوپه‌يمانى نيشتمانى ئاشكراى پابه‌ندبوين خوه‌ى كردگه وه ته‌مامى ئه‌را رينمايه‌يل مه‌رجه‌ع ئايينى و پشتگيرى سه‌رۆك وه‌زيره‌يل له‌وه‌ر ئاماده‌كردن پلانه‌يل خاسسازى و داناين پلان ئه‌را له‌ناوبردن گه‌ناته‌كارى و خاسه‌وكردن خزمه‌تگوزاريه‌يل جوور ئه‌وله‌وياتيگ له كار حكومه‌ت و په‌رله‌مان.
به‌ياننامه‌گه يه‌يش ده‌رخست ك هاوپه‌يمانى نيشتمانى حورمه‌ت له ماف خوه‌ينيشانداين هاوولاتى ئه‌گرێد، وه‌لى وه‌ل ئه‌وه‌يشا وشدارى ئه‌ياد له هه‌ر هه‌وڵيگ خراوكارى و وه‌كارهاوردن ئى خوه‌ينيشانداينه‌يله ئه‌را ئامانجه‌يليگ ك خزمه‌ت وه نيشتمان و هاووڵاتى نه‌ڕه‌سنێد و زه‌ره‌د بيه‌ێد له ماڵ و موڵك گشتى يا دژايه‌تى ده‌زگايه‌يلى ئاسايشى و هه‌ر وه‌و خاتريشه داوا له ده‌زگايه‌يل ئاسايشى كرد هه‌وڵ بيه‌ن ئه‌را مقه‌يه‌تيكردن خوه‌ينيشاندره‌يل و دابينكردن خوه‌ينيشانداين ئاشتيانه‌و دوير له كيشمه‌كيش و ئاشووگه‌رى.
