هاووڵاتییەیل داد لەدەس کارەبا کەن و پسپۆڕیگ مەرجەیل چارەی دیاری کەێد
شەفەق نیوز/ هاووڵاتییەیلیگ، ئمڕوو شەممە، بیزاری خوەیان لە بەشەوکردن وزەی کارەبا لە وڵاتەگە نشان داژ، وباس کارەبای بەشیگ لە ناوچەیل وە "هویچ" کردن، و پسپۆڕەیگ ئابووری باس توانای چارەکردن قەیرانەگە وەشیوەیگ زانستی کرد، دویای وسانن گەندەڵی و دەسوەردان سیاسیەیل کرد.
هاووڵاتییەیلیگ داد لەدەس پەککەفتن وەزارەتەگە کەن
داڵگ ئەحمەد خانمە فەفمانبەرە لە یەکیگ لە وەزارەتەیل دەوڵەت، ئەرا ئاژانس شەفەق نیوز ئویشێد: وەزارەت کارەبا لە ئەنجامداینەیل درووکانی راگەینێد، و هەناێ گەرمیەگە تیەێد ئەو ئەنجامەیلە وا بەێدەیان، ودیاری کرد ک یە چەن ساڵیگە وەی کارە چاشیایمنە، و چارەیل پینەکردن و سیستەمی داڕزیای سوودیگ نەیرن.
ئەو خانمە هەمیش ئویشێد: بەشەوکردن کارەبا لە بەشیگ لە ناوچەیل رەسیە (سفر) و وەزارەتەگە دەرەقەت پەیاکردن چارەیگ ئەرا ئی گرفت قورسە نەیرێد.
لەلای خوەییش، ئەبو رائد ئەرا ئاژانس شەفەق نیوز ئویشێد: وەزارەتەگە وە تەواوی دەرەقەت پەیاکردن هویچ چارەیگ ئەرا گرفت کارەبا نیەتێد، و دیاری کرد ک عراق گیای کارەبا لە هاوسایل کەێد، ک داهات بەشیگیان وە گوورەی چارەکیگ لە داهاتەیل عراق نییە.
ئەو هاووڵاتییە هەمیش وت: عراق ملیارا دۆلار لەبان کارەبان لەی ساڵەیلە وەبیخود خەرج کرد، وپویلەگە چوودە گیرفان گەندەڵەیل، لە وەختیگ ئەوانەگ بوینە وەزیر لە کارەبا پشت وە چارەیلیگ پینەکردن ئەرا سیستەم کارەبا بەسان، ک لە وەخت گەرمی پەکی کەفێد.
گەندەڵی و دەسوەردان سیاسیەیل نوای چارەکردن گرێد
لەلای خوەییش، باسم جەمیل ئەنتوان پسپۆڕ ئابووری ئەرا ئاژانس شەفەق ئویشێد: گرفت کارەبا لە عراق گیچەڵیگ نییە، باوجی خوازین راسسیگ و چەودیریکردن تواێد، و وسانن گەندەڵی لە سیستەم کارەبایی نیشتیمانی خوازێد، ودیاری کرد ک ری ئەرا چارەکردنی وە شیوەیگ زانستی یەس، دویای نواگردن گەندەڵی.
ئەنتوان ئویشێدیش: مەزەنەیل باس ئەوە کەن ک ئەوەگ لەبان کارەبا خەرج کریایە لە ٨٠ ملیار دۆلار رەد کردیە، لە وەختیگ وڵات میسر وە پویلیگ لەیە کەمتر گیچەڵەگەی چارەسەر کرد، ک ئەگەر وزەی ناوخوەیی لە گاز لەی کارە بخەیمنە کار وەنە فرە لەو کارەبا هاوردیمنەو ک لەدەس چگە.
ئاژانس شەفەق نیوز، تەقەلا دا پەیوەندی وە وەرپرسەیل وەزارەت کارەبا بکەێد تا ئی کارە ئاشکرا بکەن، و وڵام توومەت هاووڵاتییەیل بیەن، باوجی کەسیگ نەهاتە دەنگ.
