هاتنه‌وه‌ی خۆپیشاندانەگان لە دوو پارێزگای باشوور عراق
شەفەق نیوز/ خۆپیشاندانە ناڕەزایەتیەگان لە دوو پارێزگای باشوور عراق، ئمڕوو یەکشەممە، نووەو بوین، ئەرا داواکردن لە چاکسازی و وەرگردن مافەیل، وبڕیگ لە ناڕازیه‌گان رووی کردنە بەسانن بارەگایل حکومەتی و ریەیلیگ سەرەکی.
سەرچەوەیگ خۆجێی ئەرا ئاژانس شەفەق نیوز وت: سەدان لە ناڕازیه‌گان لە ناحیەی کعکێکە سەروە قەزای سوق شیوخ لە شار ناسریە ناوەند پارێزگای زیقار، ئمڕوو دووارە دەسکردنە خۆپیشاندان ئەرا داواکردن وە لاوردن وەڕێوبەر ناحیەگە و وەڕێوبەرەیل فەرمانگەیل خزمەتگوزاری.
وئاماژەدا ک خۆپیشاندەرەگان لە ناحیەی عکێکە فەرمانگەیلیگ حکومەتی بەسان و ری ناوبەین عکێکە وسوق شیوخ بڕین، وتیش؛ هاووڵاتیەیل تۆڕە لە کەم ئاوی وخراوی خزمەگوزاریەگان، شەوەکی ئمڕوو چگنە ناو بینای دیوان پارێزگای زیقار.
لە موسەنا، دەیان لە کارمەنەیل پاکەوکردن لە وەڕێوبەرایەتی شارەوانی سەماوە، ئمڕوو، خۆپیشاندانیگ رێکخستن لەوەردەم بارەگای وەڕێوبەرایەتیەگە ئەرا داواکردن جیوەجیکردن بڕیار ئەنجومەن وەزیران ٣١٥، ک تایبەتە وە ئاڵشتکردن سیستم گریەبەسی، وداوای خاسەوکردن سیستم دەوامیان کردن لەسای قەیران کۆرۆنا.
هەمیش لە موسەنا، ژمارەیگ لە رووژانە کارەیل لە فەرمانگەی تەندروسی پارێزگاگە، ئمڕوو خۆپیشاندانیگ رێکخستن لە وەردەم بینای فەرمانگەگە، ئەرا داواکردن وە خاسەوکردن مووچەیان و ئاڵشتکردنیان ئەرا سیستم گریەبەسی لە بان بنەمای بڕیارەیل ئەنجومەن وەزیران لە باوەت چین گریەبەسی.
