هیچ نیازیگ ئەرا هەناردەی گەنم نیە.. عراق وە ستراتیژی ئەمارکردن کارکەێد
شەفەق نیوز/ وەزارەت کشتوکاڵ عراق، ئمڕوو پەنجشەممە، راگەیان هیچ نیازیگ لە هەناردەی گەنم ئەرا ئی ساڵە نەیرێد، و دووپاتکرد ک هەرچە مینیدەو بوودە ئەمار ستراتیژیگ ئەرا وڵاتەگە.
حەمید نایف قسەکەر وەناو وەزارەتەگە ئەرا ئاژانس شەفەق نیوز وت: وەزارەتەگە گشت سامانە سروشتیەگان وەکارهاورد ئەرا سەرکەفتن کشتوکاڵ گەنم و ئەو بەرهەمەگان، ودیاری کرد لە ساڵ گوزەیشتە ١٢ ملیۆن دۆنەم کاڵی، و ٤ مەلیۆن و ٧٠٠ تەن گەنم دەرەو کرد، و دریا دەس وەزارەت بازرگانی.
نایف وتیش: ئی ساڵە ١٦ ملیۆن دۆنم کاڵیا، لەلیان ٩ ملیۆن دۆنەم ئەرا گەنم، و ٦ ملیۆن دۆنەم ئاوی، و ٣ ملیۆن دۆنەم دەیمی، تا ئیسە ئیمە نزیکیمن لە ئەنجام ٥ مەلیۆن تەن لە گەنم، و هیمان وەرگردنەگە وەردوامە.
نایف دووپاتکرد؛ هیچ نیازیگ لە هەناردەی گەنم لەی مەوقە نیە، بەڵکم زیایەگە بوودە ئەمار ستراتیژیگ، و ئەگەر زیایەگە رەسیە دوو یا سێ ملیۆن هیچ گومانیگ لە هەناردە نیە.
و نایف ئاماژەدا؛ ئەوەیگ وەزارەت بازرگانی ساڵانە خوازێدەی ئەرا کارت تەمیونیەگە خوەی ٤ مەلیۆن و ٥٠٠ هەزار تەنە.
