ناوه‌ڕووك دانيشتنگه‌ى كه‌وسه‌رانى وه‌ل سه‌ركردى فه‌سيله‌يل عراقى ئاشكرا كريا
شه‌فه‌ق نيوز/ دوياى ماوه‌يگ له كوشيان قاسم سلێمانى سه‌ركرده‌ى سه‌ربازى ئيرانى له په‌لاماريگ ئه‌مريكى وه ته‌ياره‌يگ بى ته‌ياره‌وان له عراق, جه‌ماعه‌ت حزبوڵڵاى لوبنانى ك له‌لايه‌ن ئيرانه‌و پشتگيرى ئه‌كريه‌ن دانيشتنه‌يليگ وه‌په‌له ريكخستن وه‌ل سه‌ركرده‌يل فه‌سيله‌يل چه‌كدار عراقى له‌وه‌ر يه‌كخستنه‌وه‌ى رزه‌يليان ئه‌را روێ وه‌ڕوى بوينه‌وه‌ى بۆشايى گه‌ورايگ له شوون سلێمانى، ئه‌ويش وه‌گوورى قسه‌ى دو سه‌رچه‌وه ك ئاگادار بوينه له‌و دانيشتنه‌يله.
ئه‌و هه‌ردوگ سه‌رچه‌وه باس له‌وه كردنه, ئه‌و دانيشتنه‌يله ئامانج له‌ليان هه‌ماهه‌نگى هه‌وڵه‌يل سياسى فه‌سيله‌يل چه‌كدار عراقى بويه ك فريه‌جار جيايى ئه‌كه‌فێده ناونيان و زويتر ئه‌بو مه‌هدى موهه‌ندس يه‌كيانه‌و خستياد ك ئه‌ويش له په‌لاماره ئه‌مريكيه‌گه‌ى ته‌ياره‌خانه‌ى به‌غدا كوشيا.
هه‌ردوگ سه‌رچه‌وه‌گه وتن: شێخ محه‌مه‌د كه‌وسه‌رانى نوێنه‌ر حزبوڵڵا له عراق، ك له نزيكه‌و كار وه‌ل سلێمانى كردياد ئه‌را ماوه‌ى ساڵه‌يل فريه‌يگ ميواندارى ئه‌و دانيشتنه‌يله كردگه جوور كه‌سيگ له‌جياى سلێمانى و رينمايى داسه گرووپه‌يل چه‌كدار جوور ئه‌وه‌گ سلێمانى ئه‌نجامى داگه له يه‌كيگ له دويا دانيشتنه‌يلى ئه‌را يه‌كه‌وخستن هه‌وڵه‌يل وله‌خوه‌يگرتن خوه‌ينيشاننداينه‌يل، ك له‌تى حكومه‌ت و جماعه‌ت چه‌كدار سه‌دان خوه‌ينيشانده‌ر كوشتن، وه‌لێ وه‌ل ئه‌وه‌يشا نه‌تويه‌نستن زاڵ بوونه بان خوه‌ينيشانده‌ره‌يل.
جى باسه، هه‌ردوگ سه‌رچه‌وه‌گه باس له‌يه‌يش كردنه كه‌وسه‌رانى له‌و دانيشتنه‌يله رينماييش داگه له‌بان دامه‌زرانن به‌ره‌يگ يه‌كگرتگ له‌باره‌ى هه‌ڵوژانن سه‌رۆك وه‌زيره‌يل تازه ئه‌را عراق.
