ناحيه‌يگ له دياله زياتر له 20 په‌لامار له ماوه‌ى مانگيگ له‌تى ئه‌نجام درياگه
شه‌فه‌ق نيوز/ ئداره‌ى ناحيه‌ى ئه‌لعه‌باره له باكوور خوه‌رهه‌ڵات پاريزگاى دياله، ئه‌و گرژى و ناسه‌قامگيرى ئه‌منى ئى دوياخره ك روێدا له ناحيه‌گه برده‌و ئه‌را كيشه‌ى ساڵه‌يل فريه‌يگ ك زياتر له 20 په‌لامار و روێداگ ئه‌منى له ماوه‌ى يه‌ك مانگ له‌تى كه‌فته‌سه‌و وه‌ل كه‌فتنه‌وه‌ى ده‌يان قوربانى و زه‌خمدار.
له‌ى باوه‌ته‌و، شاكر مازن ئه‌لمولا وه‌ڕيه‌وبه‌ر ناحيه‌گه له باسيگ ئه‌را ئاژانس شه‌فه‌ق نيوز، وت: حه‌وز وه‌قف ك 25كم دويره له باكوور هوه‌رهه‌ڵات باقووبه‌و ناحيه‌يل ئه‌لعه‌باره‌و ئه‌بى سه‌يدا و شوونه‌يل تر ئه‌گرێده خوه‌ى له‌لايه‌ن گرووپه‌يل تيرۆريستييه‌و گريانه‌سه ئامانج ئه‌را ماوه‌ى ساڵه‌يليگه‌و په‌لامار و رويداگه‌يل وه‌رده‌واميگ له‌تيان ئه‌نجام ئه‌گرێد وه بوونه‌ى وجوود سه‌رچه‌وه‌يل تيرۆريستى له‌ناو باخ و بووسانه‌يل و ئاوايه‌يل كشتوكاڵى ك تائيسه وه ته‌واوى پاكه‌و نه‌كريانه له تيرۆر.
ئه‌لمولا باس له‌وه‌يش كرد فريه‌يى و وه‌رده‌وامى په‌لاماره‌يل تيرۆريستى له ئه‌لعه‌باره له‌وه‌ر سروشت جوگرافييه‌گه‌يه ك بويه‌سه شوونيگ ئه‌مان ئه‌را گرووپه‌يل تيرۆريستى له ئاوايه‌يل مخێسه‌و ده‌ورگرد ئه‌بى گه‌رمه‌ى سه‌ر وه ناحيه‌ى ئه‌بى سه‌يدا.
