نێچیروان بارزانی: ناڕەزایەیل لە جیوەجیکردن مادەی ١٤٠ دژوە خوازین ٨٠% لە عراقیەیلەن
![نێچیروان بارزانی: ناڕەزایەیل لە جیوەجیکردن مادەی ١٤٠ دژوە خوازین ٨٠% لە عراقیەیلەن](https://media.shafaq.com/media/arcella/1633427986643.jpg)
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، وت: ناڕەزایەیل لە جیوەجیکردن مادەی ١٤٠ لە دەستوور، خوەیان هانە دژ خوازین ٨٠% لە عراقیەیلەن ک لە ساڵ ٢٠٠٥ دەنگیان وە دەستوور هەمیشەیی دان.
بارزانی ک خوەی جیگر سەرۆک پارت دیموکرات کوردستانە، لە فیستیڤاڵیگ هەڵبژاردن ئەرا خەڵک کەرکوک لە هەولێر وت: ئی کەرکوکییەکان، زەۊیدان دیرێد کەفێدرە وەر تەعریب، و ئەگەر کوردستانی و کەرکوکی بۊی فرە سەختە.
و ئەرا خەڵک کەرکوک وت: گشت ئیمە هایمنە گەرد ئیوە، و ئیمە لە مەغز و هۊیر و هەسمان گشتمان کەرکوکییمن، وتیش: بایەتە سامان کەرکوک ئەرا دابینکردن دەرفەتەیل کار و ئاوەدانکردنەوەی کەرکوک وەکار باێد، نەگ بوودە جی تەماکاری، و ئاڵشتکردن دیمۆگرافی پارێزگاگە.
وتیش: جەنگەگەمان لەبان ناسنامەی نیشتمانی کەرکوک و جوگرافیای میژووی بۊی، و هەمیش ئەو ناوچە دابڕیایلە وەیجۊرە، و ئیمە قەت وەدژ هۊیچ پێکاتەیگ نەۊیمنە، و دیاری کرد ک داواکاریمان وەخاتر نەفت کەرکوک نەۊیە، بەڵکم لەبان ناسنامەی کەرکوکە.
سەرۆک هەرێم وتیش: ئیمە نێخوازیمن بچیمنە ناو جەنگیگ نەتەوەیی وە تەنیا خەڵک کەرکوک، باوجی وە پێچەوانەی گشت رژیمەیل وەرین لەبان حکومڕانی عراق، خوازیمن خزمەتگوزاری پێشکەش بکەیمن و ئارامی و ئاسایش بچەسپنیمن، و پێکەوەژیان راسی لەناوبەین پێکاتەیل ئی پارێزگا بتەو بکەیمن، وژیان هاوبەشی لەناونی پێکاتەیل ئی پارێزگا وەدەس باریمن، و جەخت کرد ک ک ئیمە نێخوازیمن چارەنووس کەرکوک وە جەنگ یەکلاوە بکەیمن، باوجی لەڕی مادەی ١٤٠ لە دەستوور، و یە مافیگ شەرعی و سرووشتیە، چۊنکە لە ساڵ ٢٠٠٥ گەل عراق لەبان ئی مادە دەنگداگە.
بارزانی دووارە داوای جیوەجیکردن ئی مادەی دەستووریە کرد و وت: ئەوانەگ لە جیوەجیکردنی ناڕەزان، ئەوانە رژوە ئاشتی و دەستوور و دژوە ئارامی عراقن، و هەمیش دژوە پێکەوەژیان، وتیش: ئەوانەگ دژوە جیوەجیکردنی کار کەن، ئەوانە دژوە خوازین ئازاد ٨٠% لە گەل عراقن ئەوانەگ لەبان دەستوور دەنگیان دانە.