مووچه‌ى كارمه‌نده‌يل بويه هووكار گرتن وه‌رپرسه‌يليگ باڵا له نه‌ينه‌وا
شه‌فه‌ق نيوز/ سه‌رچه‌وه‌يگ له ده‌سه‌ى ده‌سپاكى، ئاشكراى ئه‌وه كرد وه‌ڕيه‌وبه‌ر خانه‌نشينى نه‌ينه‌واو وه‌ڕيه‌وبه‌ريگ تر و مه‌ندوب و بڕيگ له كارمه‌نده‌يل ده‌سگير كريانه، ئه‌وه‌يش له‌وه‌ر ئه‌وه‌گ رێ نه‌يانه مووچه‌ى كارمه‌نده‌يل جيگير بكريه‌ێد وه‌ل وسانن مووچه‌يل.
ئه‌و سه‌رچه‌وه ئه‌را ئاژانس شه‌فه‌ق نيوز وت: ده‌سڵاته‌يل ئه‌منى، وه‌ڕيه‌وبه‌ر ده‌زگاى خانه‌نشينى نه‌ينه‌وا و وه‌ڕيه‌وبه‌ر ماسته‌ر كارد ئه‌لنه‌خيل له موسڵ و مه‌ندوب ئداره‌ى گشتى بانك ره‌شيد و 16 كارمه‌ند تر له ئه‌لنه‌خيل ك دابه‌شن له‌بان خوه‌ندنگايه‌يل ده‌سگير كريانه.
سه‌رچه‌وه‌گه وت: ده‌سگيركردن ئه‌وانه له‌وه‌ر ئه‌وه بويه ك سه‌رپيچى له بڕيار ئه‌ميندارێتى گشتى ئه‌نجومه‌ن وه‌زيره‌يل كردنه له‌باره‌ى جيگيركردن مووچه‌يل، ك كۆمپانياى ماسته‌ر كارد ئه‌لنه‌خيل ناچار خاوه‌ن ماسته‌ر كارده‌يل كردگه ئه‌را ئاڵشتكردنى و وسانن مووچه‌يليان.
جى باسه، سه‌رچه‌وه‌گه هه‌ميش وت: دادگا وه كه‌فاله‌ت دارايى ئازاديان كردگه تا وه‌ختيگ په‌يجووريه‌يليان ته‌واو ئه‌دێ.
