مردن دوو ئەندام لە حەشد و زەخمداری کەسیگ لە رویداویگ هاتوچو لە دیالە
2022-06-17T10:25:04+00:00
شەفەق نیوز/ سەرچەوەریگ ئەمنی لە دیالە، ئمڕوو جومعە، خەوەردا لە مردن و زەخمداری ۳ ئەندام لە حەشد وە رویداو هاتوچو لە پارێزگاگە.
سەرچەوەگە وە ئاژانس شەفەق نیوز وت، " دوو ئەندام لە حەشد گیان لە دەسدانە و یەک کەسیش زەخمدار بوی لە ئەنجام لەیەکداین ماشینیان وەگەرد پاس بویچگیگ"ستارکس" لەبان ری ئاوای ئەغوات نوو 18کم باکوور خوەرهەڵات بەعقوبە.
وتیش، "ماشینەیل فریاگوزاری تەرم قوربانیەل ئەرا پزیشک یاسایی کلکردنە لە خەسخانەی خاڵس دەسڵاتدارەیل ئەمنی لێکۆلینەوە لە رویداوەگە وازکردنە".
