ماکڕۆن: ئەوەسا قونسلیەی فەڕەنسا لە مووسڵ واز کەیمن
شەفەق نیوز/ ئیمانۆێل ماکڕۆن سەرۆک فەڕەنسا، ئمڕوو یەکشەممە، راگەیان نیاز حکومەت وڵاتەگەی وە وازکردن قونسلیەی فەڕەنسا لە شار مووسڵ، و دووپات کرد ک کۆمەڵگای ناودەوڵەتی و فەڕەنسا لەناویان پابەندن وە مقەیەتیکردن ئاسایش و ئارامی لە عراق، و باس کرد ک بمباران ئاسمانی تورکیا لەبان قەزای شەنگال، نوای گلەوخواردن ئاوارەیل ئەیزیدی گرێد.
ماکڕۆن لە وتاریگ لە دیدار چەن پیاویگ ئاینی مەسیحی لە کلیسەی ساعە لە مووسڵ باس سوپاسی ئەرا هێزەیل عراقی لەنواگردن ریخریاگ داعش کرد، ک عراقییەیلە خوەیان لە سەرەتا وەرگری لە خاک خوەیان کردن، و دویای ئەوە کۆمەڵگای ناودەوڵەتی دەسوەردان کرد، وباس دەور فەڕەنسا لە جەنگ دژوە تیرۆر لە عراق کرد
هەمیش وت؛ کار ئەرا ئاوەدانکردنەوەی شار مووسڵ وە زویترین وەخت کەیمن، و چەن پڕۆژەیگ هاوە دەسمانەو، لەلیان وازکردن قونسلیەی فەڕەنسا، و هەمیشە گ وەگەردە دەسەڵاتەیل عراق کار ئەرا گلەوداین ئاوارەیلە کەیمن، و دیاری کرد ک لەوەر خراوەی خزمەتگوزاری لە مووسڵ ئاوارەیلە توانای گلەوخواردن وەرەو میلیکانیان نەیرن.
سەرۆک فەڕەنسا باس ئەوەیش کرد ک هەزاران لە ئەیزیدیەیلە ماڵ خوەیان هیشتنە جی و لەوەر ریخریاگ داعش سەر هەڵگردن، و ئیسەیش توانای گلەوخواردن وەرەو شەنگال نەیرن چوینکە تورکیا پەلامار ئەو ناوچە دەێد وەگەرد چەن ریگرییگ تر، و دووپات کرد ک رەوشەگە لە شەنگال ئارام نییە.
ماکڕۆن هەمیش وت؛ فەڕەنسا خوازێد قونسلیەیگ و مەکتەویگ لە مووسڵ واز بکەێد، و پاریس بایی ٦٠ مەلیۆن دۆلار لەی باوەتە پێشکەش کردگە، و نشان دا ک فەڕەنسا دەور کاریگەریگ لە چین پەروەردە و خوەنەواری دیرێد، و وازکردن قونسلیە و مەکتەویگ لە مووسڵ فرە گرنگە.
