لە لوتکەی قەیران کۆرۆنا.. هاوکاریه‌یل پزشکی دزیا
شەفەق نیوز/ جواد موسەوی ئەندام دەسەی تەندروسی و ژینگەی پاڕلەمانی، ئمڕوو شەممە، ئاشکراکرد لە دزیکردن بڕ گەورایگ لە هاوکاری پزشکی تورکی ك ئەرا پارێزگای کەرکوک ونەینەوا رەوانە کریاگە.
موسەوەی وە کتاویگ فەرمی ئەرا حەسەن تمیمی وەزیر تەندروسی عراقی، چاپیگی کەفتە دەس ئاژانس شەفەق نیوز، وت؛ لە بنەمای دەسڵاتمان وەگورەی سیستم ناوخۆیی ئەنجومەن نوێنەران، و دەور چەودیریمان لە دەسەی تەندروسی و ژینگە، زانیاری ئەرامان هات باس کەید وە کەمەوبوین لە هاوکاریە تورکیەگە ک رەوانە کریاگە ئەرا وەزارەت تەندروسی /فەرمانگەی تەندروسی کەرکوک و مووسڵ ئەرا نواگردن پەتای کۆڕۆنا.
وتیش؛ بڕ گەورایگ لە لی دزی کریاگە جوور دەمامەک وچشتەیل مقەیەتی لە ناو روبەریگ لە یەک کێلومەتر زیاتر نیە، ناوبەین فڕۆکەخانەی کەرکوک و خەسەخانەی کەرکوک وەگورەی هەڵوێست وەرگردنەگە. تمیمی داوا لە وەزارەت تەندروسی کرد لە چەودیری و لێکۆڵینەوە وەل هەرکەسیگ کەموکوڕی لە باوەتەگە داشتگە وەزویترین وەخت، و خەوردارمان بکەێد.
ئەمینداریەتی گشتی ئەنجومەن وەزیران عراقی، چوارشەممە، راگەیان لە رەسین فڕۆکەیگ تورکی ئەرا فڕۆکەخانەی ناودەوڵەتی بەغداد، هاوکاری پزشکی هەڵکردگە ئەرا نواگردن ڤایڕۆس کۆڕۆنا.
بارەگە ئامێر هەناسە لەناوی بوی و چشتەیل مقەیەتی و تاقیکردن، و ئەمینداریەتەگە وت؛ وەزارەت تەندروسی دەێدەی دەس فەرمانگە تەندروسیەگان لە بەغداد و پارێزگاگان، وەگورەی نیاز.
عراق هاوکاری پزشکی وەرگرێد لە جهان ورێکخراو تەندروسی جهانی ئەرا نواگردن ڤایڕۆس کۆڕۆنا، ک ژیر زەمینەی سنورداریگ لە کەرت تەندروسی دیرێد، لەوەر دەیان ساڵ لە جەنگەیل و نائارامی و گەندەڵی، ک مەترسی پەیا کەێد لە رمانن سیستمە تەندروسیەگە.
