ليژنه‌ى ئابوورى: مووچه‌ى كارمه‌نده‌يل ته‌نيا تا حزه‌يران ده‌سه‌وه‌ره و مينه‌ى چاره‌سه‌ر ئه‌كه‌يم
شه‌فه‌ق نيوز/ ليژنه‌ى ئابوورى و وه‌به‌رهاوردن نوێنه‌رايه‌تى، ئاشكراى ئه‌وه كرد حكومه‌ت عراقى تواناى ده‌سه‌وه‌ركردن مووچه‌ى كارمه‌نده‌يل نه‌يرێد له‌شوون مانگ حزه‌يران ئاينده وه بوونه‌ى داوه‌زين نرخ نه‌فت و باس له‌وه‌يش كرد كاريگه‌رى ئى مه‌سه‌له‌يشه گشت پرووژه‌يل وه‌ربه‌رهاوردن له وڵاته‌گه ئه‌گرێده‌و و جه‌خت له‌وه‌يش كرد وه‌رده‌وامه وه ل لايه‌نه‌يل په‌يوه‌نديدار ئه‌را ده‌سه‌وه‌ركردن مووچه‌يل.
له‌ى باوه‌ته‌و، ديلان غه‌فور ئه‌ندام ليژنه‌گه له باسيگ ئه‌را شه‌فه‌ق نيوز وت: بودجه‌ى گشتى ده‌وڵه‌ت عراقى 90% پشت وه داهات نه‌فت ئه‌وه‌سێد، يه‌يش ده‌رخست ك هه‌ر داوه‌زينيگ له نرخه‌يل نه‌فت كاريگه‌رى خراو ديريد له‌بان ئابوورى و مووچه‌ى كارمه‌نده‌يل و پرووژه‌يل وه‌به‌رهاوردن له وڵاته‌گه.
غه‌فور هه‌ميش وت: حكومه‌ت تواناى ئه‌وه ديريد ته‌نيا مووچه‌ى هه‌ردوگ مانگ ئايار و حزه‌يران ده‌سه‌وه‌ر بكاو دوياى ئه‌وه‌يش رێ وشوونه‌يل تر ئه‌گرێده وه‌ر له‌باره‌ى داين مووچه‌يل ئه‌گه‌ر هات و نرخ نه‌فت وه‌رده‌وام له داوه‌زين بدێ.
