پلان عاشوورا لە شار خانەقین وە سەرکەفتن کەفتەڕی
شەفەق نیوز/ قەزای خانەقین، لە پارێزگای دیالە، سەرکەفتن پلان ئەمنی موحەڕەم وە گشت کارەیلی راگەیان، وەبی هویچ رویداویگ ئەمنی، وە بەشداریکردن زیاتر لە ١٦٠٠ ئەندام ئەمنی، ئاسایش و پۆلیس گەرمیانیش لەناویان بوی.
عەمید دیار شەوکەت وەڕیەوبەر پۆلیس خانەقین ئەرا ئاژانس شەفەق نیوز وت: زیاتر لە ١٦٠٠ ئەندام ئەمنی لە کەرتەیل پۆلیس و سوپا و حەشد شەعبی و ئاسایش و پۆلیس گەرمیان و لیوای هەشتەم لە پاسەوان سنووری، پلان موحەڕەم و مقەیەتیکردن دەسەیل عاشوورا وە سەرکەفتن تەواوی جیوەجی کردن، وەبی هویچ رویداویگ ئەمنی.
شەوکەت دیاری کرد ک پلانە ئەمنیەگە مقەیەتیکردن دەسەیل عاشوورا و جیوەجیکردن کارەیلیگ وەرجەوەخت ئەرا ماڵین ئاوایەیل و ناوچە دویرەیل وناوچە نائارامەیل لەناوی بوی، و رەوانگەی هەواڵی و دەوریەیل چەودیریکردن و کامیرای گورمی ئەر نواگردن هەر جویلەیگ یا پلانیگ گومانلیکریاگ دژوە دەسەیل ئیمام حسێن.
لەلای خوەییش، حەیدەر سۆرەمەیری وەرپرس دەسەیل ئیمام حسێن لە خانقين ئەرا ئاژانس شەفەق نیوز باس سەرکەفتن پلان خزمەتگوزاری و ئەمنی موحەڕەم کرد، و دەسخوەشی لە رۆل دەزگا ئەمنیەیل وە گشت چینەیلیان کرد.
سۆرەمەیری دیاری کرد ک ٧٣ دەسەی زەنجیر و قەمە و دەسەیل خزمەتگوزاری رسوومەیل عاشوورا لە گشت ناوچەیل خانەقین جیوەجی کردن، وەناو کەشوهەوای ئارام و خزمەتگوزاری گونجیاگ، وەگەرد هاوکاری دەسەیل و هاووڵاتییەیل وەگەرد لایەنەیل پەیوەندیدار.
سەرچەوەیلیگ وەرپرس لە خانەقین دووپات لە بەشداریکردن فەرمانگەیل هەرێم کوردستان لە خانەقین لەناو پلان خزمەتگوزاری کردن، وە بەشداریکردن خوەیوەخشەیلیگ وە هەڵمەت پاکەوکردن ناوچەیل خانەقین دویای تەواوبوین رسوومەیل عاشوورا.
لەلای خوەییش، ئازاد فائق وەرپرس ئاسایش خانەقین ئەرا ئاژانس شەفەق نیوز وت: دەیان لە ئەندامەیل ئاسایش لە پلان موحەڕەم بەشداری کردن.
فائق وتیش" ئاسایش بەشداری لە مقەیەتیکردن دەسەیل حوسەینی لەناو خانەقین کرد وەهەماهەنگی وەرد هیزەیل فیدراڵی لەناو یەک پلان هاوبەش.
