لە سووەو.. عراق چەوەڕی داوەزین گەرمیە
شەفەق نیوز/ پسپۆڕ کەشناسی عەلی جابر زیادی، ئمڕوو دووشەممە، مەزەنەی داوەزین پلەی گەرمی لە ماوەی ئی هەفتە کرد، دویای ئەوە ک عراق کەفێدە وەر پارچەی وای گونجیاگ.
زیادی ئەرا ئاژانس شەفەق نیوز وت: ئەوەسا ئیواری ئمڕوو شەپوولە گەرمەگە داوەزێد، وسوو دویای رەسین پارچەی وای گونجیاگ وەگەرد وای باکوور خوەرهەڵات گورجیگ، سویەری کەشوهەواگە شکیەێدەو.
و دیاری کرد ک پلەى گەرمی لە ناوچەیل باکوور و ناوڕاس و فورات ناوڕاس وە چوار پلەی سیلیزی وەرەو خوار ئەرا ئاست خوەی گلەو خوەێد، بیجگە باشوور خوەرهەڵات وڵاتەگە.
وتیش: داوەزین لە پلەی گەرمی لە رووژەیل چوارشەممە و پەنجشەممە هەمیش دووارە بوود، تا گەرمیەگە بڕەسێدە خوار ئاست ساڵانە و بوودە (٣٨ پلە) لە بەغداد پایتەخت وشارەیل ناوڕاس و فورات ناوڕاس، لە شارەیل باکوور و خوەرئاوا لەوە کەمتر، ولە بەسرە ومیسان وکنار باشوور بڕەسێدە ٤٤ پلەی سیلیزی.
