لە دوو پارێزگا.. رفیان شوانیگ و زەخمداری 5 کەس وە رویداو هاتوچو
2023-02-27T11:14:48+00:00
شەفەق نیوز/ سەرچەوەیگ ئەمنی لە دیالە، ئمڕوو دووشەممە، خەوەردا لە زەخمداری پەنج کەس مەدەنی وە رویداویگ هاتوچو ناوبەین دیالە و هەرێم کوردستان، و ئەندامەیل داعش شوانیگ لە سەڵاحەدین رفانن.
سەرچەوەگە ئەرا ئاژانس شەفەق نیوز وت: پەنج کەس مەدەنی زەخمدار بوین لە ئەنجام لەیەکداین دوو ماشین لەبان ری خانەقین - کەلار، و بریانە خەسەخانەی خانەقین و دەسەڵاتەیل هاتوچو لێکۆڵینەوە لە رویداوەگە واز کردن.
سەرچەوەیگ ئەمنی ئەرا ئاژانس شەفەق نیوز وت: ئەندامەیلیگ لە داعش پەلامار چوار شوان مەوقەی نزیکبوینیان لە ناوچەی پەڵکانە ناوبەین قەزای کفری و دووزخورماتوو خوەرهەڵات سەڵاحەدین، و تەقەلای رفاننیان دا.
دیاری کرد ک سێیان لە شوانەیل توەنستن خوەیان بڕەسننە خاڵیگ حەشد شەعبی، و چوارەمەگە کەفتە دەس داعش، و دووپات کرد ک ئەندامەبل داعش گولەواران خاڵ حەشدەگە کردن و لەو شوینە واین.
ناوچەیل ناوبەین قەزای کفری و قەزای دووزخورماتوو رویداوەیل رفیان وەردەوامیگ ئەرا شوانەیل وەخوەیان دوینن، لەوەر ئەو چووڵی ئەمنیە و فراوانی ناوچەگە و سەختی ریوبانی.
