لە دوو پارێزگا...دراوردن تەرمیگ لە چەم فورات و خوەیکوشتن دویەت بیس ساڵانیگ
2022-07-15T15:43:27+00:00
شەفەق نیوز/ دوو سەرچەوەی ئەمنی، ئمڕوو جومعە، خەوەردان لە پەیاکردن تەرمیگ ک ناسنامەی نادیارە لە چەم فورات و خوەیکوشتن دویەت گەنجیگ 20 ساڵان لە پارێزگایەیل موسەنا و بەسرە.
سەرچەوەگە وە ئاژانس شەفەق نیوز وت:"هێزیگ لە پۆلیس دەریاوانی تەرم پیاویگ پەیاکردنە و دراوردنەسێ ک ناسنامەی نادیارە لە چەم فورات ناوراس شار سەماوە.
وتیش، هێزەیل ئەمنی تەرمەگە ئەرا پزیشک دادوەری کلکردنە ئەرا تەواوکردن رێکارەیل یاسایی.
سەرچەوەیگتر ئەمنی لە پارێزگای بەسرە وە ئاژانس شەفەق نیوز وت: " دویەت بیس ساڵانیگ خوەیکوشتیە لەری هەڵواسین پەتیگ لەناو ژوورەگەی لەناو ماڵیان لە شار بەسرە ناون پارێزگاگە.
وتیش، هووکار خوەیکوشتنەگەی تا ئیسە دیار نییە، تەرمەگە ئەرا پزیشک دادوەری کلکریایە ئەرا تەواوکردن رێکارەیل یاسایی.
