لە دوو پارێزگا.. داڵگیگ رووڵەی خوەی خەێدە چەم و پەیاکردن تەرم ژنیگ
2022-04-28T14:38:05+00:00
شەفەق نیوز/ سەرچەوەیگ لە پارێزگای دیوانیە، ئمڕوو پەنجشەممە، خەوەردا ک ژنیگ مناڵ خوەی لەبان یەکیگ لە پیەڵەیل پارێزگاگە خستە خوار، تا ئاو چەمەگە قۊتی بەێد، و پۆلیس نەینەوا تەرم ژنیگ پەیا کرد ک دەمچەوی شکیاگە و نەناسریاگە.
سەرچەوەگە ئەرا ئاژانس شەفەق نیوز وت: ژنەگە رووڵەی خوەی خستە چەم فورات لەناوڕاس شار دیوانیە، و هیمان هووکارەیل ئەو کردەو نادیارە.
وتیش: پۆلیس ئاوی وەردەوامە لە مینەکردن ئەو مناڵە لەناو چەمەگە. هەرلیوا، سەرچەوەیگ ئەمنی ئەرا ئاژانس شەفەق نیوز وت: پۆلیس پەیای تەرم ژنیگ نەناسریاگ کرد، تەمەنی وە ٤٥ ساڵان مەزەنە کریەێد، جوبەیگ سیا پووشیە، و تەرمەگەی نریاسە ناو کیسەیگ نایلۆن، و دەمچەوی تلیاگە و روخساری دیار نیە.
و دیاری کرد ک تەرمەگە لە ناوچەی حاوی کنیسە لەلای راس شار مووسڵ پەیا کریا، و ئەرا پزشک دادوەری لە مووسڵ بریا.
