لە دیالە.. باوەتەیل ماڵداری کورد یەکلاوە نەویە و "تەعریب" لە بەعس ئەوبانترە

 لە دیالە.. باوەتەیل ماڵداری کورد یەکلاوە نەویە و "تەعریب" لە بەعس ئەوبانترە
2022-09-10T11:55:19+00:00

شەفەق نیوز/ پارتی دیموکرات کوردستان لە دیالە، ئمڕوو شەممە، دووپات لە ١٣ سکاڵای ململانەی ماڵداری پیکاتەی کورد کرد، ک تا ئیسە یەکلاوە نەکریانە، وتیش: کارەیل "تەعریبکردن" ئیسە لە رەفتارەیل حزب بەعس ئەوبانترە.

شێرکۆ تەوفیق وەرپرس رێکخستن لق ١٥ی پارتی دیموکراتی کوردستان- دیالە، ئەرا ئاژانس شەفەق نیوز وت: ئەو باوەتەیلە لە قەزای خانەقین و دەورگردی، لە مەوقەی دروسکردن فەرمانگەی یەکلاکردن ململانەیل ماڵداری لە ساڵ ٢٠٠٤ تا ئیسە یەکلاوە نەکریانە، لەوەر پشتگووشخستن و کاریگەری سیاسی، هەمیش لەوەر سیاسەتەیل تەعریبکردن لەبان بەرژەوەنی پیکاتەی کورد.

تەوفیق دیاری کرد ک دادگای ململانەیل ماڵداری دویای رمیان رژیم وەرین لە خانەقین دروس کریا، و لە چارەکردن هویچ کاریگ سەرنەکەفت، وئیجا بریا بەعقوبە، ک ری لە نوای زەرەدمەنەیل کورد بڕێد، تا بڕەسنە ئەو فەرمانگە لەوەر شیوانن ئەمنی و زاڵبوین تیرۆر لەو وەختە.

وتیش: رژیم وەرین تاپوو زەوی و ماڵەیل کورد (تاپوو سیا) دادە ئەو عەرەوەیل سوونە وعەرەوەیلیگتر لە شوینەیلیگتر هاتنە، ک ئەوە گیچەڵیگ خستە نوای گلەوداین ماڵداری بریاگ کورد، وتیش: تەعریبکردن وە ئاستیگ گلەو خوارد ک لە رەفتارەیل حزب بەعس ئەوبانترە.

تەوفیق سەرسام بویە لە ئاسانکردن گلەوخواردن عەرەو ئەرا ناوچەیل کورد جاریگتر دویای رویداوەیل ئوکتۆبەر ٢٠١٧ وە ئاسانکرای سیاسی ونەتەوەیی ک کەفێدە لیست تەعریبکردن دیموگرافی رێکخریاگ، هەرچەن گشت ئەوانەگ دویای ٢٠٠٣ لە خانەقین دەرکریان قەرەبوو پویلی خوەیان وە ٢٠ مەلیۆن دینار وەگورەی مادەی ١٤٠ لە دەستوور عراقی وەرگردنە.

وەرپرسە کوردەگە کارەیل هاوردن نفووس عەرەوەیل و گلەوخواردن داگیرکەرەیل ئەرا زەویەیل کورد جاریگتر، وە پیشێلکردن ئاشکرایگ لەبان مادەی ١٤٠ دانا، و باوکردن سیاسەت رژیم بەعسە، وتیش: تەعریبکردن لە خانەقین و ناحیەیلی لە تەعریبکردن رژیم وەرین سەختترە.

تەوفیق کەمەوبوین پیکاتەی کورد لەناوچەیل دابڕیاگ لە دیالە ئامار کرد، ک وت: ٣٦ ئاوای کورد لە خانەقین بارکردنە، و ١٣ ئاوای لە جەلەولا بارکردنە لەوەر تیرۆر و شیواشیو ئەمنی و زاڵبوین هیزەیل یەک پیکاتە.

تەوفیق وتیش: بنەمای هاوبەشی ناوبەین پیکاتەیل لە دیالە تەواو بوی چوینکە مقەیەتی ماف پیکاتەیل نەکریا تایبەت کورد، و دیاری کرد ک شمارەی کوردەیل جەلەولا لە ٧٥% هاتە ٦%، و لە سەعدیە لە ٤٥% هاتە ٣% ، و لە قەرەتەپە لە ٦٠% هاتە ٨%، وكرەیل ێەکگردن ناوبەین عەرەب و کورد لە ناوچە دابڕیایەیل تەواو بوین.

Shafaq Live
Shafaq Live