لەبان توکتوک...گەنجیگ گەنجیگتر لە ناسریە کوشێد
2023-10-21T07:14:55+00:00
شەفەق نیوز/ سەرچەوەیگ ئەمنی لە پارێزگای زیقار، ئمڕوو شەممە، خەوەردا لە توومارکردن رویداویگ رخبەر لە قەزای رەفاعی لە باکوور شار ناسڕیە ناوەن پارێزگاگە.
سەرچەوەگە وە ئاژانس شەفەق نیوز وت " گەنجیگ وە چەقوو تیژیگ گەنجیگتر 18 ساڵان کوشتیە لە قەزای رەفاعیە باکوور پارێزگای زیقار"، وتیش " بکوشەگە نەوسیاگە وە کوشتن قوربانیەگە بەڵکم چوار چەقووتر لەشوینە جیاوازەیل لەشی دایە".
سەرچەوەگە وتیش، " هێزە ئەمنیەیل ئاخڵەی شوین رویداوەگە دانە و ئەرا تەواوکردن رێکارەیل یاسایی تەرمەگەی ئەرا خەسخانە کلکردنە، دەزگای ئەمنی دەسکردیەس وە مینەکردن تاوانبارەگە"، دیاریکرد " لەدویای ساعەتەیلیگ لە ئەنجامدان تاوانەگە دەسگیرکریاس، لە لێکۆڵینەوەیل سەرەتایی تاوانبارەگە تەقەلای دزین ماتوورسکڵ (توکتوکەگەی) قوربانیەگە دایە.
