قەیەغەکردن مەی قاڵ خەێدە نەوینەوا و بەغدا.. وینە
دویەکە چوارشەممە، لەناو رووژنامەی وەقائیع عراقی ک بڕیارەیل حکومەت بڵاو کەێد، یاسای مادەی ١٤/یەکەم لەناوی بوی ک ئویشێد: قەیەغەی هاوردەکردن و دروسکردن و فرووشتن گشت جویریگ لە مەی و نووشین کحولی کریەێد، و هەرکەسیگ ئی یاسا بشکنێد باجیگ خریەێدە بانی لە ١٠ مەلیۆن دینار کەمتر نییە، ولە ٢٥ مەلیۆن دینار زیاتر نییە.
خاوەن دوکانەیل مەی فرووشتن ئەرا ئاژانس شەفەق نیوز وتن: ئی بڕیارە هیلێد مەی خوەرەیل پەنا وە هووشبەری بوەن، و لایەنە وەرپرسەیلیش یە خوازن وەی بڕیارە.
هاووڵاتییگش ئەرا ئاژانس شەفەق نیوز وت: مەی لە هووشبەری خاسترە، چوینکە چاشیان لەبان هووشبەری گرفتەیل کۆمەڵایەتی و مەغزی و تەندروسی لەلی بوودەو.
خاوەن دوکانەیل مەی فرووشتن و کارخانەیل عەرەق عراقی لە پارێزگای نەینەوا، ئەرا ئاژانس شەفەق نیوز دیاری کردن ک ئی بڕیارە دوکان و کارخانەیلمان بەسێد، و هەزاران لە کراکارەیل بیکار کەێد، و کار قاچاخی مەی لەبان سنوورەگە ئەوزەڵ بوود و فرەیش گرانەو بوود.
خاوەن دوکانەیل مەی فرووشتن لە بەغداد و نەینەوا وتن: یە دوو رووژە هویچ باریگ مەی نەڕەسیە لەوەر سەختەوکردن لە خاڵ دەروازەیل هەردوگ شارەگە دویای ئی بڕیارە.
