فرەیگیان لە کوردستانن...لەماوەی یەک مانگ 12 زەویلەرزە دەێد لە عراق
2023-12-04T09:23:57+00:00
شەفەق نیوز/ دەسەی کەشناسی سەر وە وەزارەت گوارستنەوەی عراق، ئمڕوو دووشەممە، راگەیان 12 زەویلەرزە لە ماوەی مانگ تەشرین دویەم لەناو عراق رویدایە.
یەیش لە راگەێنراویگ زەویلەرزەی عراق و ناوچەیل دەوروگەردی هاتییە لەماوەی مانگ تەشرین دویەم، کە دەسەگە بڵاویکردیە و رەسیەس دەس ئاژانس شەفەق نیوز.
وەڕێوەبەر گشتی دەسەگە عەبدولعەزیم ساعدی وت، شمارەی لەرزەیل مانگ تەشرین دویەم رەسیەس ئەرا 24 زەویلەرزە کە 12 لەرزەیلە لەناو عراق بوینە، و 9ی لەناو ئیران و 2ی لەناو تورکیا، و یەکیگ لە سوریا، ئاشکەرایکرد چالاکیەیل ناو وڵاتەگەمان لە پارێزگای دهۆک چڕەوبویە (قەزاگان زاخۆ و سمێل)، و لە هەولێر و سلێمڵنی و کەرکوک و دیالە دوو زەویلەرزە لە هەر پارێزگا توومارکریاگە.
وتیش: یەک زەویلەرزە لە پارێزگای بەغدا و نەینەوا رویدایە، و ناوچەیل خوەرئاوا و خوەرئاوای باشوور عراق چووڵە لە زەویلەرزە.
