عه‌بادى هه‌وڵ هاتنه‌وه ئه‌را ده‌سه‌ڵات ئه‌ياد: ئه‌وه‌ك هه‌رێم هه‌نارده‌ى ئه‌كا له نه‌فت به‌سيه
شه‌فه‌ق نيوز/ حه‌يده‌ر عه‌بادى سه‌رۆك وه‌زيره‌يل وه‌رين، ئاماده‌س گله‌و بخوه‌ێد ئه‌را حوكمكردن عراق و خوه‌ى له‌جياى سه‌رۆك ئيسه‌ى حكومه‌ت پيشكه‌ش كردگه له بواره‌يل جياجيايگ و له‌وانه‌يش نه‌هيشتن گه‌نده‌ڵى.
عه‌بادى له ديمانه‌يگ وه‌ل ئاژانس"فرانس پرێس"باس له مه‌ترسى هاتنه‌وه‌ى كيشمه‌كيش تايفى ئه‌را عراق كرد دوياى ئه‌وه‌گ له‌سه‌رده‌م عه‌بادى سه‌كه‌فتن گه‌ورا له‌بان ريكخرياگ داعش ئه‌نجام دريا و باسيش له گه‌نده‌ڵى له وڵاته‌گه كرد ك پله‌ى دوانزه‌يه‌مين وه‌پى كه‌فتگه له ليست وڵاته‌يل زياتر گه‌نده‌ڵ له جه‌هان و قسه‌يش له‌باره‌ى هه‌رێم كوردستان كرد.
عه‌بادى له جواو پرسياريگ "فرانس پرێس"، نياز خوه‌ى ده‌رخست ئه‌را هاتنه‌وه‌ى ئه‌را حوكم و وت: ئيمه نيازمان پاكه له‌ى روێه‌و.
له‌لايگ تره‌و عه‌بادى باس له‌وه كرد ك كيشه وه‌ل هاووڵاتيه‌يل كورد نه‌يرێد و ته‌نيا وه‌ل بڕيگ له حزبه‌يل يا لايه‌نه‌يليگ زاڵ له‌بان هه‌رێم ديرێد، ئه‌ويش له ئاماژه‌يگ ئه‌را پارت ديموكرات كوردستان وه سه‌رۆكايه‌تى مه‌سعود بارزانى و وت: هه‌رێم زياتر له 400 هه‌زار به‌رميل نه‌فت رووژانه هه‌نارده ئه‌كاو يه‌يش به‌سه ئه‌را پڕه‌وكردن گشت خه‌رجه‌يل هه‌رێم و له‌خوه‌شگوزه‌رێ بژيه‌ێد.
