عراق پەیوەندییەیل دیپلۆماسی وەرد سوید بڕێد و کار کۆمپانیایگ وسنێد و مالکی پشتگیری کەێد و رەشید ئیدانە کەێد

 باسم عەوادی قسەکەر حکومەت عراق،  لە بەیاننامەیگ وت: سەرۆک وەزیرەیل عراق، محمد شیاع سودانی، رینمایی وەزارەت دەرەوەی عراق کردیە، وەرپرس کاروبار عراق لە باڵیۆزخانەی کۆمار عراق لە ستۆکهۆڵم پایتەخت سوید بکیشێدەو.

هەرلیوا داوا لە خانمە باڵیۆز سوید لە بەغدا کرد ئەرا دەرچگن لە  خاک عراق، یەیش لە وەڵامیگ  لەبان دووارە سڵاداین حکومەت سوید وە سزانن قورئان پیرووز و سوکایەتیکردن وە پیرووزە ئیسلامییەیل و سزانن پەرچەم عراق.

لەلاییگتر، سەحاف،  قسەکەر وەزارەت دەرەوەی عراق،  لە بەیاننامەی کوڵیگ وت:  داوا کریایە باڵیۆزخانەی عراق لە سوید بکیشەێد و باڵیۆز سوید ئاگادار بکریەێد کە عراق وەجی بیلێد.

 لای خوەییش باڵیگ چەکدار شیعە کە خوەیان وە "وەرخودان ئیسلامی، ئەسحاب کەهف" ناو نانە، داوا لە جەنگاوەرەیل لە ژیر ناو خوەیان کرد کە بەرژەوەندییەیل سوید بکەنە ئامانج.

 لە بەیاننامەیگ وەلایەن  ئی باڵە وت: ئەی ئەشکەفتیەیل، وەدویای گشت بەرژەوەندییل سوید  بگەردن و لەناویان بیەن.

وتیش ئەی پیاوەیل ئەشکەفت، بکەفنە شوین گشت سویدییگ، کە خوەی یەهودیگ ئیسرائیلییە و پڕتاڵ سوید وەکار تیەرێد، وتیش؛ "گشت چشتیگ کە روی دەێد لەلایەن ماڵ یەهود ناودەوڵەتی پلان ئەرای نریایە و وەڕیەو بەێد".

 بیجگە لەوەیش، عەلی ئەلموئەیید سەرۆک دەسەی ڕاگەیانن و پەیوەندییەیل، وسانن مووڵەت کارکردن کۆمپانیای ئێریکسۆن سویدی ئەرا پەیوەندییەیل لە زەوی عراق راگەیان، ئەوەیش وە مدوو مووڵەت ئەو وڵاتە ئەرا سزانن قورئان و پەرچەم عراق.

 لە بەیاننامەیگ، وەزیر پەیوەندییەیل، هیام یاسری، رینمایی قەیەغەکردن مامەڵەکردن وەلایەن وەزارەت و پیکهاتەیلی وەگەرد گشت کۆمپانیایل سویدی کەێد.

نوری مالکی، سەرۆک هاوپەیمان دەوڵەت یاسا،  لە تویتیگ باس بڕیارەگەی حکومەت عراق کرد ک وت: پشتگیری لە بڕیارەگەی حکومەت کەیمن ئەرا کیشانەوەی نوێنەرایەتی عراق لە سوید و داوایش لە باڵیۆز سوید لە بەغدا کەیمن تا خاک عراق وەجی بیلێد، جویر وەرگریکردن لە پیرووزی قورئان و پیرووزییەیل ئیسلام و سەروەری عراق.

داوایش لەو کەسەیلە کرد کە وە پیان ئویشن "وڵاتەیل ئیسلام"، نموونەی هەڵوێست عراق لە بڕین پەیوەندییەیل عراق وەگەرد سوید و دەرکردن باڵیۆزەیل، بونە ریگریگ ئەرا هەر کەسیگ کە ری وە دەسدرویژیکردن لەبان ئیسلام و موسڵمانەیل و گشت ئایینە ئیلاهییەیل بیەێد.

هەرلیوا، عەبدولەتیف جەمال ڕەشید، سەرۆک کۆمار، لە بەیاننامەیگ شەرمەزار ڕەو رەفتار ناوەرپرسانەی تەقەلای  دووارەکردن پەلامارداین کتاو خودا دانا و ویرەداری سزانن پەرچەم دەوڵەت عراق کرد.