عراق وە فەرمی جویلە کەێد ئەرا هاوردن ئەنتەرنێت لە بۆشایی ئاسمان

وەزارەتەگە لە بەیاننامەیگ رەسیە ئاژانس شەفەق نیوز وت: وە لە وەرچەوگردن ئەوە ک پڕۆژەیل پێشکەشکردن خزمەتگوزاری ئینتەرنێت لە ری کێبڵ رووشنایی تا ماوەی درویژیگ ئەرا تەواوکردن جیگیرکردنی لە گشت ناوچەیل لە ئەنجام سەختی کیشانن و هەڵکەنین و خەرج دارایی فرەیگ ئەو پڕۆژەیلە وە ئامانج هەمەڕەنگی سەرچەوەیل پێشکەشکردن خزمەتگوزاری، کە بەشدارە لە زیادکردن کێبڕکێ و کەمکردن نرخ، کردیە دەسەی را لە وەزارەت پەیوەندییەیل رەزامەنی دا لەبان دەسکردن وە ریکارەیل گریەبەستی ئەرا هاوردن (ئینتەرنێت لە ری بۆشایی ئاسمان) ئەرا یەکەمین جارە لە عراق هاوشیوەی وڵاتە پیشکەفتگەیل جەهان، وە وەکارهاوردن تەکنەلۆژیای مانگ دەسکرد خولگەی نزم ک خزمەتگوزاری ئینتەرنێت راستەوخۆ پێشکەش وە وەکارهاورەیل کەێد لەبان زەوی لە ری تووڕیگ گەورەی مانگ دەسکرد لەلایەن بڕیگ لە کۆمپانیا ناودەوڵەتیە تۆکمەیل جویر (one web) و(Space X) و( Amazon )".

وەگورەی راگەیەننەگە، وەزارەتەگە کەناڵەیل دانوسەنین کوتپڕ وەگەرد ئەو کۆمپانیایلە واز کردگە تا وەردەوام بوون لە ریکارەیل گریبەسی ئەرا رەسانن ئی خزمەتگوزارییە وە عراق لە زویترین وەخت.

 فرە لە ناوچەیل ناوەند و باشوور وڵات بیجگە لە هەرێم کوردستان وەدەس بەدی خزمەتگوزاری ئینتەرنێتەو ناڵن، ک لەی دواییە وەشیوەیگ وەرچەو گەنترەو بویە، هاوڵاتیەیلیش دەس کردنە گلەیی و داوای خاسترکردنی کەن، وەگەرد ئەو خەرج فرە ک دەنەی کۆمپانیایل پەیوەندییەیل لە وەرانەوەر ئەو توانایلە ک لە ئاست خوازین نیین.