عراق وەرپرسایەتی لەزیایبوین تووشهاتنەگان كورونا خەێدە بان هاووڵاتیەیل
شەفەق نیوز/ وەزارەت تەندروسی و ژینگەی عراق، ئمڕوو شەممە، وەرپرسایەتیەگە لە زیایبوین تووشهاتنەگان وە ڤایڕۆس کۆڕۆنا خستە بان هاووڵاتیەیل، و ئەوە جوور زەنگ هووشداری دانا.
حازم جومەیلی جیگر وەازرەت تەندروسی لە وتاریگ لە میدیا فەرمیەگان وت: زیایبوین ژمارەی تووشهاتنەگان وەپێچەوانەی ئەوەگ داوا و پێشبینی کریاگە ک سەرتای داوەزین لە ژمارەی تووشهاتنەگان دەسکەێدە پی، هەرچەن ژمارەی مردنەگان کەمەوبوی. وتیش؛ زیایبوین ژمارەی تووشهاتنەگان ئاماژەی خاسیگ نیە، و لەئەنجام نا پابەندی هاووڵاتیەیلە وەریکارەیل سەڵامەتی.
جومەیلی وتیش: وەزارەتەگە لە ماوەی گوزەیشتە چەن جاریگ هووشداریدا ک ئەگەر پابەندی نەوود ژمارەگان زیایەوبوون، و ئاماژەدا؛ ژمارەی تووشهاتنەگان ک دویەکە جومعە تۆمار کریا لە سێ هەزار تووشهاتگ رەدکرد.، وجوور زەنگ هووشدارییگە ئەرا گشت کەسیگ و گشت لایەنیگ و هەر خاوەن کاریگەرییگ لە وەجیهاوردن ریکارە تەندروسی ومقەیەتیەگان.
هەمیش وت: لایەنە ئەمنیەگان ئەرکەیل خوەیان جیوەجیکردن، و دەور گەورایگ لە چەودیری داشتن، بەڵکم لاوازیەگە ها لە جیوەجیکردن ریکارە دادوەریەگان وەرانوەر پێشیلکارەیل، و داواکرد لە گرنگی وەکارهاوردن ریکارەیل سەختیگ لە وەجیهاوردن یاسا وەرانوەر پێشیلکارەیل لە ریکارە مقەیەتیەگان، چ تاکە کەس بوود یا کومەڵە ودوکان و ماشین.
جومەیلی دیاریکرد ک تواناگان وەزارەت تەندروسی ئیسە خاسترە لە ماوەیل گوزەیشتە، و زیایکردن شەوخەف فرەیگ لە خەسەخانەگان، و ئامێرەیل هەناسە وە بڕەیل خاسیگ ئیسە دابین کریا، وگشت دەرمانەگان ک تووشهاتگەگە خوازێدەی دابین کریاگە، و دووپاتکرد: پابەندبوین هاووڵاتی وە ریکارە مقەیەتیەگان خوەی گرنگترە ئەرا کەمەوکردن ژمارەی تووشهاتنەگان.
