عراق كه‌فته دويا پله‌ى زانكۆيه‌يل سه‌ركه‌فتگ له وڵاته‌يل ئسلامى
شه‌فه‌ق نيوز/ نزيكه‌ى 65 زانكۆى توركى ناويان له ليست زانكۆيه‌يل سه‌ركه‌فتگ له جه‌هان ئسلامى ئه‌را ساڵ(2018)هاتگه وه‌گووره‌ى ئاماريگ له‌لايه‌ن محه‌مه‌د جه‌واد ده‌هقانى وه‌رپرس ئاماره‌يل زانستيه‌يل جه‌هان ئسلامى(ISC)له ئيران.
ده‌هقانى وت: زوورم ئه‌و زانكۆيه‌يله ك ناويان هاتگه له ليست زانكۆيه‌يل سه‌ركه‌فتگ ئسلامى پيكهاتنه له زانكۆيه‌يل توركيا ك(65)زانكۆ و دوياى ئه‌وه‌يش ئيران(35) زانكۆ و ماليزيا(18) زانكۆ، وه‌پله‌ى 1, 2, 3 له‌شوون يه‌كترى.
ده‌هقانى هه‌ميش وت: ته‌رتيب وڵاته‌يل تر ئسلامى له‌ڕوى شماره‌ى زانكۆيه‌يل سه‌ركه‌فتگ وه‌ى جووره‌سه: مسر (16 زانكۆ) ، پاكستان (11 زانكۆ) ، سعوديه (10 زانكۆ) ، تونس (5 زانكۆ) ، ئيندونيسيا ونه‌يجيريا ( 4 زانكۆ)، لوبنان ، قه‌ته‌ر ، ئيمارات ، ئوردن ، به‌نغگلاديش ، كازاخستان (هه‌ر يه‌كيگ له‌ليان 2 زانكۆ) ، ئۆغندا ، عومان ، كوه‌يت ، مه‌غرب ، كاميرۆن ، جه‌زائر و عراق (يه‌ك زانكۆ).
