عراق شەپۆل چوارەم کۆرۆنا رەد کەێد

شەفەق نیوز/ وەزارەت تەندروسی عراق راگەیان، عراق نزیکە شەپۆل چوارەم ڤایرۆس کۆرۆنا بنەێدە پشتسەر، ک کاریگەری کەمتر بۊیە لە شەپۆلەیل وەرین. 

سەیف بەدر، قسەکەر وەزارەت تەندروسی عراق لە لێدوانیگ رووژنامەوانی راگەیان "کەمەوبۊن شمارەی تۊشبۊیەیل و قوربانیەیل کۆرۆنا دیاری ئەوە کەێد پەتاگە لە عراق وەرەو کەمەوبۊن چوود، یەیش مانای ئەوەس، ک شەپۆل چوارەم پەتاگە وە سەڵامەتی رەد کریا". 

وتیش "شەپۆل چوارەم کۆرۆنا وە گشتی بەراورد وە شەپۆلەگانتر  پەتاگە کاریگەریی کەمتر داشت، باوجی چەن ئاماژەیگ هەس ئەرا دەرکەفتن شەپۆلیگتر کۆرۆنا، جۊر ئەوەگ لە چەن وڵاتیگ بڵاوبۊیە". 

قسەکەر وەزارەت تەندروسی عراق، دیاریکردیە "پرۆسەی ڤاکسین کردنی هاووڵاتییەیل وەردەوامە، فرەیەگ ئەوانەیش تۊش پەتاگە بوون لەو کەسەیلەن ک هۊچ تاقەبەشیگ ڤاکسین وەرنەگردنە".